Къабарты-Малкъарны экономиканы айнытыу министри Рахайланы Борис «Россейни экспорт арасы» АО-ну келечиси Андреева Н. А. бла тюбешип ушакъ бардыргъанды. Анга бизни республикада «Мени бизнесим» араны башчысы Хадис Дударов эмда министерствону маркетинг эм тыш байламлыкъла бёлюмюню таматасы Севиль Богацкая да къатышхандыла.

Тюбешиуде Къабарты-Малкъарда Экспортха себеплик этиу араны быйылгъы ишини юсюнден сёлешиннгенди. Ол а экспорт бла кюрешгенлеге билеклик этеди, эки жюзден артыкъ гитче эмда орта предпринимательство субъектлени онгдурады. Жылны ахырына дери аны болушлугъу бла сегиз экспорт келишим этилликди. Сора дагъыда онбир семинар бардырыллыкъды,  алагъа жюзден артыкъ предприниматель эм предприятие къатышырыкъдыла.

Республиканы Правительствосуну болушлугъу бла бизнес-жамауатны келечилери бир ненча магъаналы халкъла аралы кёрмючге къатышырыкъдыла. Алагъа шуёх къыралладан бирине бизнес-жолоучулукъ бардырыллыкъды, ызы бла уа андан келечилени бери Къабарты-Малкъаргъа чакъырлыкъдыла.

Тюбешиуде айтылгъаныча, Араны эмда КъМР-ни Правительствосуну болушлукълары бла предприятияла «Продэкспо 2024» (Москвада), «Apple & Garden Expo» (Къазахстанда), «Аш-азыкъ индустрия 2024» (Беларусь) эм талай башха кёрмючледе болгъандыла. Алагъа деп «Эл мюлк продукцияны экспорту. Бизнесге жангы онгла» семинар, «Халкъла аралы экспорт бла къалай кюрешип башларгъа» мастер-класс, Арменияда рынокга чыгъыу бла байламлы вебинар бардырылгъан эди.

Этилген ишни къыйматы уллуду. Сёз ючюн, 2023 жылны эсеплерине кёре буруннгу жылдан эсе эки процентге аслам экспорт жумуш тамамланнганды, аны аллында жылдан эсе уа - 32,1 процентге кёп. Быйылны биринчи жарымында экспорт  былтырны ол кезиуюнден 1,6 кереге кёбейгенди.

Улбашланы Мурат хазырлагъанды.