Кёп болмай Россейни Правительствосуну Председателини орунбасары Дмитрий Патрушев къыралны агропромышленный комплексинде болумгъа жораланнган кенгеш бардыргъанды. Анга видеоконференция халда КъМР-ни эл мюлк министри Хасан Сижажев да къатышханды.

- Бюгюнлюкде регионланы барысында да мирзеулюк битимлени оруп башлагъандыла. Саулай алып айтханда, 93 миллион тонна чакълы тирлик алыннганды. Андан 75 миллион тоннадан артыгъы будайгъа жетеди. Быйыл хауа болумла бла байламлы Юг, Ара эм Поволжье округланы субъектлери бай тирлик бла къууандырыргъа ушамайдыла. Болсада Эл мюлк министерствону эсеплерине тийишлиликде мирзеуню бар тюрлюлеринден да эм азындан 132 миллион тонна жыйылыр деп, уллу ышаныулукъ барды, - дегенди Дмитрий Николаевич.

Кезиулю сабан ишлени юслеринден айтханда, федерал къуллукъчу толусунлай кесибизни урлугъубузну хайырланыргъа кереклисин чертгенди. Кюзлюкледе себилген урлугъубузну 90 проценти кесибизде чыгъарылгъанын да юлгюге келтиргенди, ол санда кезиулю ишле болжалдан кеч къалмай тамамланыргъа кереклисине да энчи эс бургъанды.

Къабарты-Малкъарны юсюнден айтханда, бюгюнлюкде республиканы мюлклеринде нартюхню, чёплеуню, сояны, тахта кёгетлени, жемишлени да жыйып кюрешедиле. Алай бла жети айны ичинде республиканы жерчилик бла байламлы бёлюмю ахшы жетишимле болдуралгъанды. Сагъынылгъан кезиуде эл мюлк продукциядан 24,4 миллиард сом багъасы чыгъарылгъанды. Ол былтырдан 4,1 процентге артыкъды. Ашарыкъладан бла   суусап сууладан бютюн аслам сатылгъанды.

Эсге сала айтсакъ, жерчиликде бай тирлик алыуну къыйматлы амалладан бири сугъарыуду. Алай бла жыл башланнганлы «Халкъла аралы кооперация бла экспорт» миллет проектни «Агропромышленный комплекс продукцияны экспорту» программасына кёре сугъарылгъан жерлеге энттада 2,4 минг гектар къошулурча мадар этилгенди.

Курданланы Сулейман хазырлагъанды.