КъМР-ни Транспорт эмда жол мюлк министерствосундан билдиргенлерича, «Къоркъуусуз эмда тынгылы автомобиль жолла» миллет проектге кёре бюгюнлюкде онбир медицина организациягъа баргъан жолланы 27 километр чакълы биринде тынгылы ремонт ишле бардырылгъандыла. Ол санда тийишли ишле жети элде тамамланнгандыла.

Аны баш магъанасы адамла къыйналмазча эм къоркъуусузлукълары жалчытылынырча этергеди. Ишлени кезиуюнде жолгъа жангы асфальт жайгъанларындан сора да, «зебраланы» жангыртадыла, тротуарланы болумларына къаралады, бордюрла, темир буруула, светофорла, жорукъланы билдирген белгиле, ызла салынадыла эм машинала сюелирча жерле къураладыла.

Алай бла Бабугентде, Шордаковода, Куба-Таба, Огъары эм Тёбен Куркужинде, Псыгансууда амбулаторияла, участокну больницасы, фельдшер-акушер пункт орналгъан жолла жангыртылгъандыла. Нальчикде диализ бла медицина арала, 2-чи номерли поликлиника эм башха медицина учрежденияла орналгъан Хуранов, Мусука улу, Малкъар эм Юность орамлагъа да тынгылы ремонт этилгенди.

Дагъыда 2-чи Таман дивизия орамны да жангыртылгъан объектледен эм уллуларына санарчады. Ол республикада иги кесек больницагъа орналгъан «Дубки» микрорайоннга эм башха социал магъаналы объектлеге элтеди.  

Андан сора да, регионну жол фонду бёлген субсидиягъа Нальчикде Шогенцуков, Къашхатауда район аралы больницагъа баргъан эм Аушигерде поликлиника орналгъан жоллагъа къаралгъанды.