Жанхотияны орта школну да, бирси мектепледеча, зауукълу кезиу башланды. Билимни кюнюнде анда арбазда эшитилген тюрлю-тюрлю макъамла келген къонакъланы кёллерин жарыкъ эте, къууандыргъандыла. Сабйлени жюреклери уа жангы умутладан, къучакълары тюрсюнлю шарладан бла гюлледен толуп эдиле. Байрамны баш жигитлери, биринчи классланы окъуучулары выпускниклени къолларындан тутуп сахнагъа чыкъгъандыла. Ала ол кюн жашауларыны аламат кезиулерине биринчи атлам этгендиле. Жанларында тургъан 11-чи классны окъуучулары алагъа биринчи классда билеклик, нёгерлик да этерик адамла болгъанларын ангылайдыла. Аланы алгъышларгъа ол кюн Жанхотия элни администрациясыны башчысы Заурбий Кашифович Хамурзов, Бахсан районну билим бериу управлениясыны ишчилери да келген эдиле. Ала окъуучуланы жангы окъуу жылда бютюн да кёл салып окъургъа, алларына салгъан муратларына таукел жетерге, билим кёп затны башы болгъанын унутмазгъа да чакъыра, саулукълула, насыплыла болурларын тежегендиле.

Назмула бла жырла башланырдан алгъа сёз мектепни таматасы Геккиланы Нуржан Исмайыловнагъа берилгенди. Ол сабийлени алгъышлап, къонакълагъа ыразылыгъын билдиргенди.

Ызы бла «Сабийликни навигаторлары» деген битеуроссей акцияны чеклеринде 11-чи классланы окъуучулары биринчи классха келген сабийлеге «Келлик заманны самолётчукълары» акцияны чеклеринде, ичинде ариу алгъышла жазылгъан къагъытдан ишленнген самолётчукъланы саугъалагъандыла. Байрамда жарыкъ жырла, къызыу къарсла да кёп эдиле. Аны эм магъаналы кесеги, биринчи къонгуроуну къагъылыуу уа, уллуну гитчени да эслеринде къаллыгъы сёзсюздю.

Темуккуланы Асият.