РусГидро компанияны Къабарты-Малкъарда бёлюмюню келечилери, чабакъчылыкъ жаны бла федерал агентствону Запад-Каспий управлениясыны специалистлери бла бирге  бу кюнледе республиканы череклерине каспий лососьчукъладан 200 мингден артыгъын жибергендиле. Быллай магъаналы иш тёртюнчю кере бардырылады. Быйыл компанияны себеплиги бла суулада чабакъланы саны бир миллиондан асламгъа кёбейгенди. Саулай алып айтханда, акция бардырылгъан жылланы ичинде компания череклени 5 миллион чабакъ бла байыкъландыргъанды, деп билдиргендиле бёлюмню пресс-службасындан.

Чабакъчыкъла жиберилирге керек болгъан жерле илму-излем тинтиулеге кёре белгиленедиле. Ала бир жылны энчи фермалада ёсдюрюледиле эм 12-20 грамм ауурлукъ алгъанлай, черекге бошланырча боладыла. 

Бу акцияны РусГидро биринчи кере 2003 жылда Узакъ Востокда бардыргъанды. Ол заманда Амур тийреледе Бурей ГЭС-ни огъары жанында кёлге 36 минг чабакъчыкъ жиберилгенди. Ызы бла бу ахшы башламчылыкъгъа компанияны Къабарты-Малкъарда, Дагъыстанда, Къарачай-Черкесде, Шимал Осетияда бёлюмлери, Новосибирск, Саратов, Жигулёвск, Воткинск, Чебоксары, Къобан ГЭС-ле эм Чувашияда ток сатыу бла кюрешген предприятие да къошулгъандыла. Андан бери бу регионлада суулагъа чабакъланы тюрлю-тюрлюлеринден талайы жиберилгенди. Аланы араларында уа Къызыл китапха тюшгенле да бардыла.

Эсге сала айтсакъ: РусГидро объектлери болгъан регионлада экология болумну игилендирилирча аслам иш этеди. Ол санда социал, гуманитар, жарыкъландырыу программаланы, акцияланы бла проектлени бардырады.

Энчи сакъланнган жерлеге турист эмда экология жолчукъла къураугъа, табийгъатда аз тюбеген жаныуарланы бла битимлени жайыугъа да юлюшюн къошады.

Курданланы Сулейман.