Алгъаракълада кёнделенчи жаш Доттуланы Омар, Минги тауну башына чыгъып, анда сабийлени бла жаш тёлюню «Биринчилени атламлары» деген биригиуню байрагъын орнатыргъа сюйгенин билдирген эди. Ол аламат атламгъа элтген муратына да жетгенди.

Алгъаракълада Доттуланы Омар «Биринчилени атламлары» битеуроссей биригиуню директорларыны советини таматасы Григорий Гуровдан Минги тауну башына чыгъарлыкъ байракъда къол ызын къоярын тилеген эди. Биринчи июньда уа ол «Биринчилени» фестивалына тюшеди. Алай бла муратына, бир атламгъа болса да, жууукълашады.

   Ызы бла Къабарты-Малкъарны Башчысы Казбек Коков бла тюбешиуюнде ол байракъда аны да къол салырын тилейди. Андан сора уа Элбрусха ёрлеуге   къыстау хазырланып башлайды. Минги таугъа хар ким да бош алай чыгъып къалалмайды. Умуту не уллу болса да, хазырланыу а айла бла бардырылгъанды. Алай бла, 9 августда алтысагъатлыкъ ёрлеуден сора, эрттенликде 8 сагъат 23 минутда Ёвропаны эм бийик тёппесинде «Биринчилени атламлары» битеуроссей биригиуню байрагъы орнатылгъанды.