Къэбэрдей-Балъкъэрым Футболым дихьэххэм я лигэр (ЛФЛ) къыщызэзыгъэпэщар Нарткъалэ къыщалъхуа Мидаев зэкъуэшхэу Уэсмэнрэ Умаррэщ.

ЩIалэхэр ныбжьыщIэу Мэзкуу Iэпхъуэри, абы школри университетри къыщаухащ, а псом къадэкIуэу, футболымкIэ «Торпедо-ЗИЛ»-м и еджапIэри къаухащ, ауэ ар лэжьыгъэ нэхъыщхьэ яхуэхъуакъым.

2016 гъэм Къэбэрдей-Балъкъэрым къагъэзэжа нэужь, футболым ехьэлIауэ яIэ хъуэпсапIэхэр щалъхуа лъахэм щызрагъэхъулIащ: а спорт лIэужьыгъуэм дихьэххэм я лигэ (ЛФЛ) ди деж къыщызэрагъэпэщащ, куэди дэмыкIыу абы и цIэр къэралым и щIыналъэхэм щызэлъащIысащ.

КъБР-м Футболым дихьэххэм я лигэм, топджэгу зэIущIэхэр къызэгъэпэщынымрэ егъэкIуэкIынымрэ ямызакъуэу, лэжьыгъэшхуэ ирегъэкIуэкI цIыху нэхъыбэ, псом хуэмыдэу щIалэгъуалэр, спортым дегъэхьэхыным, къыдэкIуэтей ныбжьыщIэхэр щIэпхъаджагъэхэм, Iуэхугъуэ мыщхьэпэхэм пэIэщIэ щIыным ехьэлIауэ, апхуэдэуи къэрал IуэхущIапIэхэм ядолажьэ, нэгъуэщI Iуэхугъуэхэри къызэрегъэпэщ.

Зы илъэсым къриубыдэу КъБР-м и ЛФЛ-м топджэгу зэIущIэу, чемпионат зэхуэмыдэу 15-м щIигъу ирегъэкIуэкI. Абыхэм зэхьэзэхуэу 3000-м нэблагъэ, цIыхур мин бжыгъэкIэ къызэщIаубыдэ, Кавказ Ищхъэрэм и щIыналъэхэри яфIэхьэлэмэту къакIэлъоплъ. Футболым дихьэххэм я лигэм и зэпеуэхэр хамэ къэралхэм щыпсэухэми эфир занщIэхэмкIэ зрагъэлъагъу.

«Урысейр футболыр фIыуэ щалъагъу къэралщ» фIэщыгъэм щIэту мы гъэм ирагъэкIуэкIа зэхьэзэхуэм и япэ увыпIэр Урысейм и футбол зэгухьэныгъэм къыхуигъэфэщащ КъБР-м и ЛФЛ-м. А зэпеуэм щагъэлъэгъуащ УФ-м и щIыналъэхэм ящыщу 77-м я пэхуэщIэу 444-рэ. РФС-м и унафэщI Дюков Александр зэхьэзэхуэм и саугъэтыр КъБР-м и ЛФЛ-м Мэзкуу къыщритыжащ.

Къэбэрдей-Балъкъэрым и Iэтащхьэ КIуэкIуэ Казбек и унафэкIэ, КъБР-м ЩIалэгъуалэм я IуэхухэмкIэ и министерствэр къыдэIэпыкъуу, республикэм и ЛФЛ-м къызэригъэпэщащ футболымкIэ зэхьэзэхуэр, «ЩIыналъэхэм я зэхэуэ» («Битва районов») зыфIащар. Абы и къалэн нэхъыщхьэу щытар лъэпкъ зэныбжьэгъугъэр гъэбыдэнырщ. ЩIалэгъуалэм я гъэмахуэ зыгъэпсэхугъуэр къызэригъэпэщу, республикэм и щIыналъэхэр футболымкIэ зэпищIащ ЛФЛ-м. КъызэгъэпэщакIуэхэм мазитIкIэ районхэр къызэхакIухьащ, текIуэхэр къагъэнэIуащ. КIэух зэпеуэм щынэхъ лъэщахэр иужькIэ Налшык щызэIущIэнущ, нэхъыфIыр муниципалитетхэм къыхахыжынущ.

Мы гъэм «ЩIыналъэхэм я зэхэуэ» зэхьэзэхуэм и кIэух зэIущIэр Iэтауэ ирагъэкIуэкIащ. КърихьэлIахэм ар зэрекIуэкIым яхутепсэлъыхьащ Матч ТВ-м и комментатор цIэрыIуэ Нагучев Роман. Мыдрейуэ, зэхьэзэхуэм ипэ къихуэу, топджэгу губгъуэм щызэIущIащ Матч ТВ-м и командэмрэ «Спартак-Налшыкым» и ветеранхэмрэ.

Ди командэм и щIыхьыр яхъумащ ди цIыхухэм я гур къэзыхьэхуа, куэдым фIыуэ ялъэгъуа Джудович Миодраг, КъБР-м ФуболымкIэ и федерацэм и унафэщI Мэшыкъуэ Аслъэн, Корчагин Эрик, Узденов Роман, ди командэм и капитану «Спартак»-р РФПЛ-м изыша Заруцкий Александр, УЕФА-м и Кубокыр къэзыхьа Таранов Иван, Европэм и чемпионатым гъуаплъэ медалыр къыщызыхьа Сычёв Дмитрий сымэ, нэгъуэщIхэми. щекIуэкIынур Налшыкщ, шыщхьэуIум и 11-м.