«Кубок Наследия» фIэщыгъэр зэрихьэу Налшык къалэм иджыблагъэ щекIуэкIащ футболымкIэ сабийхэм, 2017 гъэм къалъхуахэм, я зэхьэзэхуэ. Абы хэтащ Кавказ Ищхъэрэм и щIыналъэхэм я лIыкIуэхэу КъБР-м и Прохладнэ къалэм и «Энергетик», Ставрополь крайм и «Спартак», Дагъыстэным и «Победа», Осетие Ищхъэрэ - Аланием и «Алания KIDS», Псыхуабэ къалэм и «Юниор», КъБР-м и «Iуащхьэмахуэ» командэхэр.

Налшык къалэм Iэпщэ Александр и цIэр зэрихьэу дэт спорт еджапIэм и «Iуащхьэмахуэм» и топджэгу цIыкIухэм зэхьэзэхуэм хъарзынэу зыкъыщагъэлъэгъуащ. Финалым и Iыхьэ ныкъуэм абыхэм къащыпэщIэтащ Хасавюрт къалэм и «Победа»-р икIи мыбдежым хьэщIэхэр нэхъ лъэщу къыщIэкIащ. 
Ещанэ увыпIэм щхьэкIэ ди командэр хуэзащ Псыхуабэ къалэм и «Юниор»-м икIи ар абы къыфIихьащ, апхуэдэ щIыкIэкIи домбеякъ медалыр зыIэрагъэхьащ. Командэм и тренерыр Кульбаев Маратщ.
Зэхьэзэхуэм къыхэжаныкIа ныбжьыщIэ цIыкIухэм саугъэт щхьэхуэхэр иратащ. Топджэгу нэхъыфIу къалъытащ Гузоев Дамир, гъуащхьэтет нэхъыфIыр Хажилиев Эмирщ.