Налшык щыхэплъэжащ «Унагъуэ зэ­къуэтыр гъащIэм ехъулIэ унагъуэщ» къалэ ­зэпеуэм ­кърикIуахэм. Абы и унэтIыныгъэхэм я зым и лауреат хъуащ Къэзаншхэ я уна­гъуэр.

Къэзанш Жанетэ КъБР-м щыIэ УФСИН-м и уголовнэ-гъэзэщIакIуэ инспекцэм и канцеля­рием и унафэщIу мэлажьэ илъэсым щIигъуауэ. Аращ Унагъуэм и илъэсым тещIыхьауэ ирагъэкIуэкI зэхьэзэхуэм хэтыну и адэ-анэр тезыгъэгушхуар. Зэпеуэм и къызэгъэпэщакIуэщ Налшык къалэм щыIэ ЦIыхубзхэм я ­советыр. 
Къэзаншхэ Хьэсэнрэ Нинэрэ быниплI яIэщ. Унагъуэм и тхьэмадэм мыIэрысей хадэ зэре­-хьэ, анэр адыгэбзэмрэ литературэмкIэ егъэджакIуэщ. Я пхъум и жэрдэмыр абыхэм даIы­гъащ икIи хущIегъуэжакъым. Ахэр хэтащ «Жылагъуэм хуэлэжьэн» Iыхьэм.
Зэпеуэм хэтхэм утыку кърахьащ унагъуэ хабзэхэр, творческэ номерхэр ягъэлъэгъуащ, теп­сэлъыхьащ дэзыхьэххэм, илъэс куэдкIэ лъа­гъуныгъэмрэ зызэхэщIыкIынымрэ хъумэныр къазэрехъулIэм. 
«Унагъуэ зэкъуэтыр гъащIэм ехъулIэ уна­гъуэщ» зэхьэзэхуэм щынэхъыфIу къалъытахэр къыщыхахащ Балъкъэр театрым. Гулъытэ ­игъуэтащ Къэзаншхэ я унагъуэми. Абы къратащ дипломрэ кубокрэ. 

УАРДЭ Жантинэ.