«Сильва» опереттэр ягъэлъэгъуащ

Макъамэ театрым и 56-нэ лэжьэгъуэ пIалъэр зэхуищIыжащ IыхьитIу зэхэт ­Кальман Имре и «Сильва» опереттэмкIэ. Макъамэ театрым ар щигъэуващ режиссёр, КъБР-м щэнхабзэмкIэ щIыхь зиIэ и лэжьакIуэ Сафаровэ Тамарэ.

Лэжьыгъэм щытепсэлъыхьым, абы къыхигъэщащ классикэм сытым дежи щIэупщIэ иIэми, абы щIэщыгъуагъ хэплъ­хьэни зэрыхуейр. ЩIалэгъуалэм тыншу зыхащIэн папщIэ, пьесэ щыбгъэувкIэ Iэмал зэхуэмыдэхэм ухуокIуэ. Режиссёрым жиIащ а тхыгъэмкIэ теплъэгъуэ зы­мыгъэува зы театри Урысейм зэрыщы­мыIэр. 
- Зызымыхъуэжу мыбы хэтыр зыщ - венгр композитор Кальман Имре итха макъамэ телъыджэрщ, - къыхигъэщащ абы. - Илъэс 45- рэ япэ ди Макъамэ театрым ­игъэувауэ щытащ «Сильва» опереттэр. Мис ноби ар щIэрыщIэу театреплъхэм я ­пащхьэм идохьэ. Дигуи ди пси хэлъщ абы, иджырей гупсысэ щIыдолъхьэ, щIалэгъуа­лэр къыдыдохьэх. Опереттэм щыджэгухэм я гугъу пщIымэ, щIалэгъуалэ зэчиифIэ защIэщ - ГъуазджэмкIэ Кавказ Ищхъэрэ институтым щеджахэрщ. Сильвэ и ролыр егъэзащIэ Габоевэ Зухра. ЦIыхубзым игу щыщIэнкIэ ­хъунур апхуэдизу уи фIэщ ищIу къегъэлъагъуэри, а ролым къыхуигъэщIами ярейщ. 
Опереттэм къыщыхъу Iуэхугъуэу хъуар къегъэщIылIащ Сильвэ. КъызэрыгуэкI ды­дэу къожьэри, Будапешт варьетем и примэ мэхъу ар. Бзылъхугъэм и гум къы­дыхьащ джыназ Эдвин. Ар дзэм офи­це­ру хэтщ. И унагъуэ къулейм хуит къащIыркъым «артисткэ» къызэрыгуэкIыр къишэну. Эдвин и ролыр фIыуэ къехъулIащ Ма­къамэ театрым и артист пажэ Абей Рус­-там.
Режиссёрым къыхигъэщащ трагедиери комедиери зэщIэлъу икIи зэкIуу артистхэм утыкум къызэрыщагъэлъэгъуэфар. ЛIы­хъужьхэр зэхигъэщхьэхукIыу, къызыхэкIарэ бгъэдэлъ мылъкурэ елъытауэ зэхуэмыдэ ищIу опереттэм щыпхыша гупсысэр и кIэухым деж зэхощэщэжри, цIыху къэс насып иIэну Iэмал зэрыщыIэр гурыIуэгъуэ мэхъу.
ГЪУЭТ  Синэ.

Поделиться:

ЧИТАТЬ ТАКЖЕ:

11.02.2025 - 15:02

ЗэкIэ и закъуэщ

Самбэ

11.02.2025 - 12:25

БлэкIамрэ нобэмрэ зэпащIэ

«Искож» хьэблэм щаухуа Щэнхабзэ зыужьыныгъэмкIэ центрым япэу щагъэлъэгъуащ «Лица Кавказа» выставкэр.

11.02.2025 - 09:03

Наркотикым и бийхэр

Республикэм и курыт еджапIэхэм я командэхэм футзалымкIэ я зэхьэзэхуэ «Налшык» спорт комплексым щекIуэкIащ. «Фэ топ» фIэщыгъэр зезыхьэ а зэпеуэр хохьэ еджакIуэхэм я футбол лигэм.

11.02.2025 - 09:03

Сом мелуан 224-кIэ нэхъыбэщ

«Урысей сетхэр - Кавказ Ищхъэрэ» IуэхущIапIэм и къудамэу Къэбэрдей-Балъкъэрым щыIэм 2024 гъэм республикэм и цIыхухэм яхуищIа Iуэхутхьэбзэм къыпэкIуа ахъшэр къанэ щымыIэу къыхихыжащ икIи ар сом мела

11.02.2025 - 09:03

Щапхъэхэм толажьэ

КъыдэкIуэтей щIэблэм я зэхэщIыкIым зегъэIэтыным, зыдэплъеин нэрылъагъу щапхъэхэр нэхъыбэ щIыным и IуэхукIэ Хэкум и хъумакIуэм и илъэсым къриубыдэу къэралым лэжьыгъэ зэмылIэужьыгъуэ куэд щекIуэкIыну