Россейни МЧС-ден келген эсеплеге кёре, жылны аллындан башлап суулада солугъан кезиулеринде мингден аслам адам ёлгенди, деп билдиредиле ведомствону регионда бёлюмюнден.

Быллай болум 41 регионда эсленеди. Бютюнда уа ёлгенлени араларында сабийле аслам болгъанлары сагъайтады. Ведомствону башчысы Александр Куренков белгилегенича, ёлгенле 1,6 мингден асламдыла, аладан 2 жюзге жууугъу уа сабийледиле. «Былтыргъы тарихле бла тенглешдиргенде, быйыл ачыгъанланы саны иги да кёпдю. Синоптиклени айтханларына кёре, жууукъ заманда кюн къызыулай къаллыкъды. Алай эсе уа, адамла сууланы жагъаларында солургъа излерикдиле. Аны ючюн бютюнда солуу кюнледе хазырлылыкъда турургъа керекди. Адамла кёбюсюнде кеслерине асыры базынадыла, ол а хатагъа келтирмей хазна къалмайды», - дегенди министр.

Жангызда жайны аллындан суулада 1238 болум эсепленнгенди, алада 1056 адам ёлгенди. 

 Аны бла байламлы МЧС-ни регионлада бёлюмлерине, жер-жерли самоуправление органлагъа адамланы суулада къоркъуусузлукъларын жалчытырча мадарланы кючлерге эсгертиу этилгенди.

Кульчаланы Зульфия.