«Кубок Пересвета» фIэщыгъэр зэрихьэу Дон Iус Ростов къалэм иджыблагъэ щекIуэкIащ каратэмкIэ урысейпсо зэхьэзэхуэ. Абы хэтащ ди къэралым и щIыналъэхэм ящыщу 30-м я спортсмену 1150-рэ. 

Къэбэрдей-Балъкъэрым и каратистхэм зэхьэзэхуэм екIуу зыкъыщагъэлъэгъуащ икIи медаль зэхуэмыдэу I3 къахьащ. Я хьэлъагъ елъытауэ зыхэта гупхэм щытекIуащ Блий Изабеллэ, Гузеев Къантемыр, Гуэбэшы Аскэр, Гуэбэшы Арнеллэ сымэ.
ЕтIуанэ увыпIэм дэкIуеящ Ольмезовэ Айзэ, ТхьэкIумашэ Залым, ТекIуий Алий, КIэбышэ Ислъам сымэ. Бетокъуэ Темырлан, Аргъэщокъуэ Къантемыр, ТIакъ Дамир, Этезова Эльмэ, Бобров Даниил сымэ ещанэ хъуащ. 
Мы гъэм мэкъуауэгъуэм Красноярск къалэм щызэхэтыну Урысейм и еджакIуэхэм я 12-нэ спартакиадэм и кIэух зэхьэзэхуэм хэтыну Iэмал ягъуэтащ Гуэбэшы Арнеллэ, ТекIуий Алий, КIэбышэ Ислъам, Ныбэжь Аслъэнбэч сымэ.
Гуэбэшы Аслъэн, КIэмпIарэ Рустам, Мэш Азэмэт сымэщ командэм ядэлажьэр. 

АЛЫДЖЫКЪУЭ Руслан.