Черек районну школгъа дери сабийле жюрюген учреждениялада ишлеген юйретиучюле, аланы болушлукъчулары да кюн сайын жюрек жылыуларын алагъа келген къызчыкълагъа бла жашчыкълагъа къызгъанмай бередиле. Ата-анала да балаларын  сабий садлагъа уллу ыразылыкъ бла келтиредиле, нек дегенде анда тургъан  сабийлеге  деп битеу онгла къуралгъандыла. Аны бла бирге  къызчыкъланы бла жашчыкъланы кёп жаны бла да юйретедиле, айнытадыла. Не айтырыгъы барды,  сабийле кеслери да бек сюйюп келедиле садлагъа.
Огъары Малкъарда  1-чи номерли мектепге бойсуннган «Кюнчюк»  сабий садда ишлегенле хар эрттен сайын биринчи кичи къауумгъа жюрюген балачыкълагъа   жарыкъ тюбейдиле, аладан жюрек жылыуларын аямайдыла.  Къантемирланы Танзиля, Гергъокъаланы Аслижан эмда аланы болушлукъчулары Хозаланы Жаннет анда ишлегенли иги кесек жыл болуп келеди. Ала мектепге тынгылы хазырлагъан сабийлени санап саны жокъду.
Сынаулу юйретиучюле  садикге келгенле заманларын эригиусюз, хайырлы да ётдюрюр ючюн къолдан келгенни аямайдыла.  Аланы хар кюнлери да бир бирге ушамайдыла: оюн халда дерсле, байрамла, айтхылы адамлагъа, табийгъатха, тарыхха, маданиятха эм башха белгили кюнлеге аталгъан ингирле  бла тюбешиуле бардырадыла, сабийлени хунерликлерин ачыкълар муратда ала къагъытда, пластилинден да ишлеген суратладан кёрмючле къурайдыла.