Урысей Федерацэм и Президент Путин Владимир и УнафэкIэ самбэ спорт лIэужьыгъуэр цIыхубэм зэрахихьэм, илъэс куэд хъуауэ псэ хьэлэлкIэ зэрылэжьам папщIэ Адыгэ Республикэм щыщ самбист цIэрыIуэ Хьэсанэ Мурат «Хэкум и пащхьэ щиIэ фIыщIэм папщIэ» орденым и етIуанэ нагъыщэ зиIэ медалыр къыхуагъэфэщащ.
- Мурат бэнакIуэ къызэрымыкIуэщ, урысейпсо, дунейпсо зэхьэзэхуэхэм мызэ-мытIэу пашэ щыхъуащ. Егъэлея лъэпкъ хэмыту жысIэфынущ ар ди республикэм и спорт ехъулIэныгъэм и дамыгъэу. УФ-м и Къэрал Думэм и депутат къулыкъум зэрыпэрытым къыдэкIуэу, Хьэсанэм иджыри спортыр егъэфIэкIуэным гуащIэшхуэ хелъхьэ, Адыгейм и псэукIэ-экономикэ зыужьыныгъэм жыджэру хуолажьэ. Ди щIыналъэм къыбгъэдэкIыу Парламентым зэрыщыIэм и фIыгъэкIэ ди хэку цIыкIум, ди цIыхубэм яфI зыхэлъ Iуэху куэд ипэкIэ егъэкIуатэ, - щитхащ Адыгэ Республикэм и Iэтащхьэ КъумпIыл Мурат и телеграм-каналым.
Iэтащхьэм жиIащ самбэ спорт лIэужьыгъуэр Адыгейм спортым и лейуэ къызэрыщалъытэр. Абы зыхуагъасэ ныбжьыщIэ 1800-м, абыхэм ядэлажьэр пщIэшхуэ зиIэ тренер цIэрыIуэхэщ. Зэгуэрым СамбомкIэ Мейкъуапэ дэта школыр дуней псом щыпашэу щытащ. 60 гъэхэм Адамий къуажэм цIыкIухэр гъэсэн щыщIизащ Къудей Мурат. ИужькIэ Адыгейм щылэжьащ ГъукIэл Аслъэнбэч, Дэхъужь Шумахуэ, Iэщын Алик сымэ я нэIэм щIэт секцэхэр.
Самбом и зыужьыныгъэр нэхъыбэу зрапхыр Куэблэ Екъуб и цIэрщ. Абы и фIыгъэкIэ Адыгейм и спортсменхэр дуней псом къыщацIыхуауэ щытащ. Иджыри куэдым ящIэж абы и гъэсакIуэхэу Костоков Гъумер, Невзоров Владимир, Хьэпай Iэрамбий, Емыжь Iэрамбий, нэгъуэщIхэри.
Адыгэ самбист цIэрыIуэ Хьэсанэ Мурат и ехъулIэныгъэхэм я фIыгъэкIэ, республикэм и мызакъуэу, ди къэралми самбом зыщиужьащ.
Адыгейм и Куэшхьэблэ районым щыщ Еджэрыкъуей къуажэм къыщалъхуа Хьэсанэ Мурат дуней псом 11-рэ и чемпион хъуащ, Дунейпсо кубокыр 8 къихьащ, Европэм 5 щытекIуащ, 19-рэ къэралым дыщэр щызыIэригъэхьащ. Илъэс пщыкIутхум щIигъукIэ Урысей Федерацэм и командэ къыхэхам и капитану щытащ ар икIи зыхэт спорт лIэужьыгъуэм щынэхъ лъэщ дыдэу куэдрэ къалъытащ. Абы самбомкIэ къэралми дунейми къыщыпэлъэщын щыIакъым 1993 - 2006 гъэхэм.
Мейкъуапэ дэт Адыгэ къэрал университетым и спорт факультетым зэрыщеджэм хуэдэурэ, Самбомрэ дзюдомкIэ олимп резервым и школым зыщигъэсащ. Ар хэтащ Невзоров Виктор, Себелев Александр, Щхьэлахъуэхэ Валентинрэ Русланрэ ягъасэ гупхэм.
1980 гъэм Москва щекIуэкIа гъэмахуэ Олимп джэгухэм жэз медалыр къыщызыхьа Емыжь Iэрамбий Хьэсанэ Мурат и тренеру щытащ. Мурат жэуаплыныгъэшхуэ хэлъу зигъасэурэ, Урысей Федерацэм щынэхъ лъэщ хъуащ. Зыхэта зэхьэзэхуэхэм Мурат зыри къыщытекIуакъым икIи илъэсибгъукIэ зэкIэлъхьэужьу (1998 - 2006 гъэхэм) дуней псом и чемпион хъуащ! Аращ «Самбом и пащтыхь» къыщIыфIащари. Абы къыхуагъэфэщащ «СамбомкIэ спортым щIыхь зиIэ и мастер», Зэныбжьэгъугъэм и орден дамыгъэ лъапIэхэр, нэгъуэщIхэри.
НэщIэпыджэ Замирэ.
