Къабарты-Малкъарны Правительствосуну кезиулю кенгешинде сюзюуге чыгъарылгъан биринчи проект республиканы иелигинде болгъан мюлкню къыйматлы хайырланыу бла байламлы эди. Аны юсюнден жер эмда ырысхы бла байламлы халланы министри Аслан Тохов айтханды. Ол билдиргенича, бу оноу РФ-ни Правительствосуну тийишли буйругъуна таянып этилгенди. Анга кёре власть органла эмда учрежденияла къырал информациялы системагъа отчётларын жиберип турургъа борчлудула. Анга уа бу министерство кёз-къулакъ боллукъду эмда тинтгенлей турлукъду.
Экономиканы айнытыу министр Рахайланы Борис республиканы бюджетинден субсидияла бериу Низам тохташдырылгъанын туура этгенди. Сёз мында инвестициялы проектин тамамлагъан организация этген къоранчланы бир кесегин анга къайтарыуну юсюнден барады. Аллай амал «Россей Федерацияда ишге ахча бла къошулургъа себеплик этиу эмда аны къоруулау» деген законну чеклеринде бериледи. Борис Магомедович билдиргеннге кёре, бюгюнлюкде республикада РФ-ни Экономиканы айнытыу министерствосу, КъМР-ни Правительствосу эмда инвестициялы проектин бардыргъан организацияла келишим этген эки проект барды: Тырныауузда магъадан чыкъгъан жерни хайырланыу эмда «Чегем-Агро» комплекс.
Талай предметлени терен окъургъа неда профильли билим алыргъа инсанланы энчи айырыу неда окъуу учреждениялагъа кёчюрюу Низамгъа тюрлениуле кийириуню юсюнден жарыкъландырыу эмда илму министрни къуллугъун толтургъан Екатерина Мисостова айтханды. Ол билдиргенича, ала билим бериу жангыртылгъан федерал мардалагъа кёчгени бла байламлыдыла. Ол а быйыл сентябрьде болгъанды.
Екатерина Николаевна дагъыда «Ишге орналыргъа себеплик этиу» федерал проектге къатышханланы жумушларына келир жыл башланнгынчы дери ким къарарыгъын тохташдыргъанларын билдиргенди.
Урунуу эмда социал къоруулау министр Асанланы Алим талай проектин туура этгенди. Биринчиси КъМР-ни Правительствосуну бир ненча актларына тюрлениуле кийириу бла байламлы эди. Алада аскер комиссариат чакъырып СВО-да къуллукъ этерге баргъанланы, ары кеслери эркинликлери бла тебирегенлени, анда жаралы болгъанланы, анда ёлгенлени юйюрлерин, Херсондан къачып келип бизни республикада орналгъанланы, къыйын техноген болумлада саулукъларына хата тюшгенлени, тылда уруннганланы эмда талай башха къауумлагъа киргенлени онгдурууну юсюнден айтылады.
Министр дагъыда Нальчикге 2005 жылда 13-14 октябрьде чабыууллукъ этилгенде кеслерини борчларын толтуруп ауушхан правону къоруулау органланы келечилерини юйюрлерине, сора дагъыда къыйын жашау болумлагъа тюшген инсанлагъа ахча бла себеплик этиллигин билдиргенди.
КъМР-ни Саулукъ сакълау министерствосу, регионну Правительствосу эмда ОМС Фонд хар жыл сайын келишим этедиле. Анда медицина болушлукъ бериуде къырал гарантияланы юсюнден айтылады. Анда табылгъан кемчиликлени кетериу жумушланы планын тамамлауну эмда программаны дефицитин къурутуу графикни саулукъ сакълау министр Рустам Калибатов туура этгенди. Ол дагъыда ауругъанлагъа жашау этерге керекли препаратланы тизмесине тюшген дарманланы (оптовый) сатыуда багъаларына къошакъны мардасыны юсюнден айтханды, сатып алгъанда этилген келишимлени энчиликлери бла шагъырейлендиргенди, башха регионлада бу жаны бла иш къалай болгъанын да билдиргенди.
Жаш тёлюню ишлери жаны бла министр Азамат Люев а министерствону бойсунууунда болгъан учреждениялада уруннганланы айлыкъ хакъларын кётюрюрге оноу этилгенин, ишчиле келир жылдан башлап неллай бир алып тебирериклерин да билдиргенди. Айлыкъны орталыкъ ёлчеми онсегиз минг сомдан 32 мингнге жетерикди. Бёлюмлени башчылары уа шёндюледе 25 минг сом ала эселе, энди 36 минг алып башларыкъдыла.
Улбашланы Мурат.
