И БГЪЭГУР ТИТАНКIЭ ЗЭРАХЪУЭКIАЩ

Тэн Iус Ростов къалэм Лышх узыфэхэмкIэ и щIэныгъэ-медицинэ IуэхущIапIэм операцэ телъыджэ щрагъэкIуэкIащ иджыблагъэ. А узыфэ шынагъуэм иубыда бзылъхугъэм и бгъэгур титанкIэ зэрахъуэкIащ, зэрыжаIэмкIи, операцэр хъарзынэу зэфIэкIащ.

ИлъэситI ипэ Дагъыстэным щыщ бзылъхугъэм (илъэс 36-рэ хъурт абы щыгъуэ) и бгъэм лышх шыкъыр хэлъу къагъуэтри, дохутырхэр еIэзат. Мы гъэмахуэ кIуам абы гу зылъитэжащ и бгъэм аргуэру шыкъыр гуэр хищIэжауэ икIи ростов онкоцентрым екIуэлIащ, абы и щIэныгъэлIхэр зригъэплъыну.

Бзылъхугъэм и узыншагъэр къыщапщытэм, илъэситI ипэ къефыкIа лышхым лъахъыц иутIыпщу и бгъэгу къупщхьэм зритыжауэ, уеблэмэ сантиметри 5 хъууэ шыкъырышхуэ хищIауэ къыщIэкIащ. Арами, онкологиемкIэ щIэныгъэ-медицинэ институтым и дохутырхэм хэкIыпIэ къагъуэтащ: абыхэм лышхыр зыкIэрищIа къупщхьэр къызэрыхагъэжам и закъуэ мыхъуу, и бгъэгур титаным къыхэщIыкIакIэ зэрахъуэкIащ.

- Апхуэдэ операцэхэм куэдрэ урихьэлIэркъым. Ростов онкоцентрыр къапщтэмэ, япэ дыдэ щедгъэкIуэкIауэ аращ. ЦIыхум и къупщхьэ гуэр къэтмэ, ар зэрызэрахъуэкI 3D-имплант жыхуэтIэ IэмалыщIэр къэдгъэсэбэпыну дытегушхуэри, дыхущIегъуэжакъым, - жеIэ медицинэ щIэныгъэхэмкIэ доктор, РАН-м и академик,  лышх узыфэхэмкIэ Ростов къалэм дэт щIэныгъэ-медицинэ институтым и унафэщI Кит Олег.

ЦIыхубз сымаджэм и бгъэгум и зэхэлъыкIэ дыдэм хуэдэ титаным къыхащIыкIын папщIэ, абы и пкъым компьютер томографиекIэ  3D сурэт трахри, имплантыр принтеркIэ традзащ. Ар игъэхьэзыращ биомедицинэмкIэ урысей IуэхущIапIэм. ГъэщIэгъуэнракъэ, имплантым грамми 100 и хьэлъагъыу аращ!

- Имплантыр традзэху бзылъхугъэм химиекIэ деIэзащ, армыхъумэ лышхыр хэхъуэнут. Ар сэбэп хъури, шыкъырыр къызэтеувыIат икIи зызыхиубгъуа къупщхьэри къыхэдгъэжри, титан имплантыр занщIэу хэдгъэуващ, - жеIэ операцэр щрагъэкIуэкIа къудамэм и унафэщI, медицинэ щIэныгъэхэмкIэ кандидат Харагезов Дмитрий. 

Операцэр апхуэдизкIэ фIыуэ зэфIэкIащи, хагъэувар зыкIи къеныкъуэкъуркъым. ЩIатхыкIыжащ, лэжьапIэм дэкIыжынуи зегъэхьэзыр.

Фырэ Анфисэ.

Поделиться:

ЧИТАТЬ ТАКЖЕ:

16.04.2024 - 12:35

ХЬЭЦIЫКIУ БАШИР И ЗЭФIЭКI

Ди республикэми гъунэгъу щIыналъэхэми къыщацIыху уэрэджыIакIуэ щIалэщ ХьэцIыкIу Башир.

16.04.2024 - 08:21

ЗЭНЫБЖЬЭГЪУГЪЭР ЯПЭ ИРАГЪЭЩУ

Налшык къалэм дэт «Каисса» шахмат центрым иджыблагъэ республикэ зэхьэзэхуэ щекIуэкIащ. КъызэрыгуэкI шахмат джэгукIэмкIэ абы щызэпеуащ зауэ зэпэщIэувэныгъэхэм, дзэ Iуэху хэхахэм хэтахэр.

16.04.2024 - 08:19

КIЫЩ АСЛЪЭНБЭЧ И ДЫЩЭХЭМ КЪЫХЕГЪАХЪУЭ

Мэлыжьыхьым и 9 - 10-хэм Орёл къалэм щекIуэкIащ тэмэму зэхэзмыххэм я деж пашэныгъэр алыдж-урым бэнэкIэмкIэ къыщыхьыным хуэунэтIа зэхьэзэхуэ.

16.04.2024 - 08:18

СОЧЭ КЪАЩЫПОПЛЪЭ

«Белая Ладья» фIэщыгъэр зэрихьэу Налшык къалэм иджыблагъэ щекIуэкIащ курыт еджапIэхэм я командэхэм шахматымкIэ я урысейпсо зэхьэзэхуэ зэIуха.

16.04.2024 - 08:18

КЪЫЩIАГЪЭКIЫМ И КУЭДАГЪЫМ ХОХЪУЭ

Къэбэрдей-Балъкъэрым Мэкъумэш хозяйствэмкIэ и министерствэм иджыблагъэ къызэритамкIэ, 2024 гъэм и щIышылэ -мазаем къриубыдэу республикэм къыщыщIагъэкIа IэфIыкIэхэкIхэм я куэдагъым процент 24-кIэ, н