«2023 жылны экспортёру» конкурсну Шимал Кавказда кезиуюнде хорлагъанланы эмда ал жерлени алгъанланы кёп болмай Махачкъалада саугъалагъандыла, деп билдиргендиле КъМР-ни Промышленность, энергетика эм сатыу-алыу министерствосундан.

Конкурсну эксперт комиссиясы алгъаракъда онтёрт номинацияда юч биринчи жерге тийишли болгъанланы айыргъанды. Эки биринчи жерни, бир экинчини эмда бир а ючюнчюню Къабарты-Малкъардан предпринимательле алгъандыла.

Промышленность бёлюмде «Терекалмаз» болгъанды биринчи. «Эм иги тиширыу экспортёр» номинацияда уа «ТД «Аква-Кристалл» предприятияны башчысы Мадина Аришева хорлагъанды. «Хазыр аш-азыкъны бёлюмюнде жылны экспортёру» дегенде да бу предприятияны ючюнчю жерге тийишли кёргендиле. «АПК продукцияны сферасында жылны экспортёру» бёлюмде экинчи жерге урлукъчулукъ бла кюрешген «Отбор» ООО чыкъгъанды.

«Жылны экспортёру» премия сау жылны ичинде бардырылгъан ишни къыйматын ачыкълайды. Бюгюн биз жетишимле болдургъан коллегаларыбыз, аны бла бирге уа къыралыбыз ючюн къууанабыз, быллай къармашыулу предпринимательле бла ёхтемленебиз. Шимал Кавказ федерал округну экспорту ахыр жылны ичинде иги ёсгенин да белгилерге тийишлиди», – дегенди Россейни экспорт арасына кирген Росэксимбанкны башчысыны къуллугъун толтургъан Татьяна Сахарова.