Вольнэ Аул - Хьэсэней - Джэрпэджэж - Къэщкъэтау автомобиль зекIуапIэм щыщу километри 3,8-рэ зи кIыхьагъыр щIыналъэм и гъуэгу фондым и ахъшэкIэ, къызыхуэтыншэу зэрагъэпэщыж.
IэщIагъэлIхэм гъуэгум жьы техъухьа асфальт-бетоныр трагъэкъэбзыкIыжауэ, и лъабжьэр зыгъэбыдэ лэжьыгъэ ирагъэкIуэкI: пшахъуэрэ ятIэ быдэкIэ зэхэпщар траубэ, итIанэ мывэ кIэщхърэ щIы дагъэкIэ зэхэгъэпцIыхьа асфальт-бетон ткIуаткIуэр тракIэнущ.
Хьэсэней къуажэм и гугъу тщIымэ, Аттоевым и цIэр зезыхьэ уэрамым и машинэ зекIуапIэр зэрагъэпэщыж. Абы къыдэкIуэу, Белинскэм и цIэр зезыхьэм деж щыщIэдзауэ Киевскэ зи фIэщыгъэм нэс щиухыжу телъ гъуэгу дэзыгъэзейм и щIэгъэкъуэнхэр зэрахъуэкI, жьы хъуахэр зэрыта кумбхэр нэхъ кууужу щаубрурэ щагъэбыдэжу.
ИщхьэкIэ зи гугъу тщIа километри 3,8-м асфальтыщIэ тIуащIэ «трабзэнущ», лъэс зекIуапIэхэр къыщагъэщIэрэщIэжынущ, «Т.7»- нэ светофорыщIэхэмкIэ зэгъэпэща зэпрыкIыпIэхэр щаубзыхунущ, гъуэгунапщIэ Iуфэхэр мывэ гъэжахэмкIэ Iуагъэбыдыхьынущ.
КъинэмыщIауэ, гъуэгуухуэхэм автомобиль зекIуапIэм гуэкI-къыхыхьэ и Iыхьэхэр зэрагъэпэщыжынущ, и щхьэфэм машинэ зэблэкIыпIэхэр зэрызэхэпцIыхукIыфыну дамыгъэхэр трагъэжыхьынущ, шынагъуэншагъэм тещIыхьа нагъыщэхэр зыхуэныкъуэхэм деж щагъэувынущ.
Гъуэгуухуэхэм я мурадщ бжьыхьэ дызыхуэкIуэр имыкI щIыкIэ пщэрылъ къыщащIа псори и кIэм нэсу ягъэзэщIэну.
АЗЫЧЭ Бэллэ.
