Хабзэ зэрыхъуауэ, Музейхэм я жэщыр щагъэлъапIэ, накъыгъэм и 20-м ирихьэлIэу зэхыхьэ щIэщыгъуэхэр къызэрагъэпэщ УФ-м ЩэнхабзэмкIэ и министерствэмрэ Урысейм ис лъэпкъхэм я хъугъуэфIыгъуэхэмрэ хабзэхэмрэ хъумэным хухэха «Культура.РФ.» порталымрэ зэщIыгъуу. Мы гъэм а Iуэхур тхыдэм нэхъ тегъэщIауэ щытащ.
Фигу къэдгъэкIыжынщи, а пщыхьэщхьэм музейхэр, сурэт галереехэр, щэнхабзэ IуэхущIапIэхэр мэлажьэ. Ахэр зыхущIэкъури цIыху нэхъыбэ кърашалIэу, псом хуэмыдэу щIалэгъуалэр, хуэсакъыу яхъумэ хъугъуэфIыгъуэхэр, хьэпшып лъапIэхэр ягъэлъэгъуэну, щапхъэу къалъытэ цIыху цIэрыIуэхэр, лIыхъужьхэр ирагъэцIыхуну, тхыдэ къэхъугъэхэм хагъэгъуэзэну аращ.
Республикэм и къалэхэмрэ къуажэхэмрэ мы жэщым Iуэху зэмылIэужьыгъуэхэр къыхузэрагъэпэщащ, я ныбжьми зыпэрыт лэжьыгъэми емылъытауэ псоми гъэщIэгъуэн ящы-хъуну. Псалъэм папщIэ, КъБР-м и Лъэпкъ музейм щекIуэкIащ «Музейхэм я жэщыр». Музейм и пэIущIэ пэшым щагъэуващ Къэбэрдей-Балъкъэрым и музей Iуэхум и тхыдэм, Лъэпкъ музейм и лэжьыгъэр зэрызэфIагъэувам, абы и лъабжьэр зыгъэтIылъа цIыхухэм ятеухуа «Наши педагоги-наставники», «Кабардино-Балкария. Путь через века» выставкэхэр.
Музейм и къудамэм и унафэщI Къантемыр Ларисэ зэрыжиIамкIэ, нэхъапэм музей Iуэхум зы щIыпIи ущыхурагъаджэу щытакъым. Абы къыхэкIыу музейм и лэжьакIуэ нэхъыжьхэр абыхэм япэ итахэрщ Iуэхум хэзышар.
- Ди музейм и тхыдэр къыгуэхыпIэ имыIэу епхащ выставкэм хэдгъэхьа дэтхэнэ цIыхуми теухуа тхыгъэхэм, - къыхигъэщащ Къантемыр Ларисэ. - Музей фондыр къызэзыгъэпэщар, цIыхухэр музейм къезышэлIар ахэращ. Мы выставкэхэм дэркIэ мыхьэнэшхуэ яIэщ. Ди япэ ита ди лэжьэгъухэм я Iуэхум пыдощэ, абыхэм я чэнджэщ щхьэпэхэр ноби къыдогъэсэбэп. Къэбгъэлъагъуэмэ, мис Къатхъэн Назир и сурэтыр. «Къэбэрдей» газетым и зы къыдэкIыгъуэщ, «Адыгэ лъэпкъ музей» тхыгъэр къызытехуар. Абы Къалмыкъ БетIал цIыхубэм защыхуегъазэ музейм пасэрей хьэпшыпхэр щIалъхьэну.
АдэкIэ Къантемыр Ларисэ тепсэлъыхьащ музейм и унафэщIхэу Ермоленкэ Макар, Къуэныкъуей Му-хьэж сымэ яхузэфIэкIам.
Шэджэм щIыналъэм хыхьэ Звёзд-нэ къуажэм къикIа еджакIуэхэм Лъэпкъ музейм и къудамэм и унафэщI Буринэ Миленэ яригъэлъэгъуащ «Кабардино-Балкария: путь через века» выставкэр. Музейм и япэ къатым щагъэлъагъуэ «Рерихи и Кавказ», етIуанэ къатым - «Налшык - зауэлI щIыхьым и къалэщ» выставкэхэр.
Лъэпкъ музейм и фондым щахъумэ хьэпшыпхэр къызытещ пощт картэ-хэр а махуэм «ягъэсащ». КъыкIэлъыкIуэу, Iуэхум хыхьэу ягъэпэжащ Лъэпкъ музейм дэлажьэ ныбжьыщIэ жыджэрхэр. Лъэпкъ музейм и щIыхь тхылъыр иратащ сабий творчествэмкIэ «ДыгъафIэ къалэ» академием и еджакIуэхэм, «Шэху уэздыгъэ» литературэ студием и гъэсэнхэм.
Музейм и унафэщI Накуэ Феликс къытеувыIащ иджыпсту зэлэжь гъэлъэгъуэныгъэм, республикэм щыпсэу лъэпкъхэм ятеухуауэ щытынум.
Ткаченкэ Андрей и цIэр зезыхьэ СурэтыщI гъуазджэхэмкIэ музейми щагъэуващ «История, эпоха, люди» выставкэр.
Вовчок Маркэ и цIэр зезыхьэ фэеплъ унэ-музейм щекIуэкIащ «Школа не была их работой. Школа была их жизнью» зэIущIэр. Ар теухуауэ щытащ Бэрэгъунхэ я егъэджакIуэхэм.
Котляревскэ станицэм и музейм щагъэлъэгъуащ «Здесь живёт история» выставкэр. Абы щатащ «Счастье своими руками» мастер-классыр. Зэхыхьэр щиухым абы хэтахэр ирагъэплъащ «Новь станицы Котляревская» фильмым.
Прохладнэ къалэми щыпащащ урысейпсо зэхыхьэхэм. Къалэм и тхыдэ-лъахэхутэ музейм щекIуэкIащ «Учитель, перед именем твоим» зэIущIэр. Шэджэм къалэм КIыщокъуэ Алим и цIэр зезыхьэ и тхыдэ-лъахэхутэ музейм щекIуэкIащ «Пока черкесским веет ветром, сиять мне пламенным огнём» зэIущIэр. Кулиев Къайсын и цIэр зезыхьэ фэеплъ унэ-музейм щызэхэтащ «Солдаты Победы» гукъэкIыж пшыхьыр. Гундэлэн къуажэм Отаров Омар и цIэр зезыхьэ и тхыдэ-лъахэхутэ музейм щагъэлъэгъуащ «История одной коллекции» зыфIащар. Май районым и тхыдэ-лъахэхутэ музейм щекIуэкIащ «Педагог - не звание, педагог - призвание» лекцэр. Дзэлыкъуэ районым и тхыдэ-лъахэхутэ музейм - «История селений Лесгор и Бруненталь» пшыхьыр.
ТЕКIУЖЬ Заретэ.
Сурэтхэр КЪАРЕЙ Элинэ трихащ.
