Профсоюзхэм ЩэнхабзэмкIэ я уардэунэм иджыблагъэ щекIуэкIащ «Креативные каникулы» зэхыхьэ дахэр.

А зэхыхьэр зи жэрдэмри режиссёрри Гумэ Маринэщ. Проектыр зэрырагъажьэрэ абы и гъусэщ «Горянка» газетыр. Абыхэм къадэIэпыкъуащ: КъБР-м ЩIалэгъуалэм я IуэхухэмкIэ министерствэр, Къэрал концерт гъэлъэгъуапIэр, Налшык дэт хьэлвэ заводыр, «Нальчик-сладость» IэфIыкIэ щащI фабрикэр, проектым и ныбжьэгъуфI Хуссаин Беллэ сымэ.

ЩхъуэкIэплъыкIэу гъэщIэрэщIа утыкум гъэщIэгъуэн куэд щыболъагъу. Сабийхэм саугъэт цIыкIухэр ират, IэфIыкIэкIэ ягъэтхъэж. Къыхэгъэщыпхъэщ мыбы дэтхэнэри пщIэншэу зэрыщIагъэхьар. Уи гуапэ мыхъуу къанэркъым зи Iэпкълъэпкъым сэкъат иIэ ныбжьыщIэ цIыкIухэми я нэгу зрагъэужьыну къызэрырагъэблэгъар.

Утыкур артист ныбжьыщIэхэм хуит хуащIат а махуэм.

Гъатхэ концерт ягъэлъагъуэрт гимнастикэмкIэ «Эльбрус» федерацэм и гъэсэнхэм (унафэщIыр Терентьевэ Иннэщ). «ДыгъафIэ жьыбгъэ» фIэщыгъэм щIэту абыхэм ягъэхьэзыра теплъэгъуэм гур хигъахъуэрт. А цIыкIухэм яужь утыкум къихьащ Налшык дэт сабий гъуазджэхэмкIэ школ №1-м щеджэхэу Чочаевэ Марьятрэ Шэвлокъуэ Мариерэ (унафэщIыр Кошелевэ Еленэщ). Бахъсэн щIыналъэм и «Бахъсэн ауз» цIыхубэ къэфакIуэ гупым ягъэзэщIа «Лъапэрисэм» цIыкIуи ини дихьэхат.

Ставрополь щIыналъэм щыщу кърагъэблэгъа клоунхэм сабийхэр топышхуэкIэ ягъэджэгури, итIанэ къуажэхь зыбжанэ кърагъэщIащ. КъэщIэрейхэм саугъэт иратащ.

Пшынауэ ныбжьыщIэ Сэбаншы Ислъам концертым къыпищащ. Абы къыкIэлъыкIуэу утыкум зыкъыщагъэлъэгъуащ «Вагъуэ цIыкIу» ансамблым и къэфакIуэ пажэ Бэрсэдж Елдар (унафэщIыр Къурашэ Эдикщ), «Арабеск» ансамблым хэт хъыджэбз цIыкIухэм (унафэщIыр Доброседовэ Лилиещ).

Концертым щагъэлъэгъуащ сабийхэм я гъатхэ фэилъхьэгъуэхэр, «Fashion07» студием (унафэщIыр Дохъущокъуэ Каринэщ) щадауэ. КIэщI дыдэу жыпIэнумэ, дахэ защIэт ахэр.

КафэмкIэ «Каллисто» театрым (унафэщIыр Романихинэ Иринэщ) и нэхъыщIэ гупым адэкIэ утыкур хуит хуащIащ.

КъБКъУ-м и «Пересмешник» сабий театрым (унафэщIыр Дохъущокъуэ Мадинэщ) «Али-Баба и сорок разбойников» музыкэ спектаклым щыщ пычыгъуэ ягъэлъэгъуам хуаIэта IэгуауэхэмкIэ ар ныбжьыщIэхэм ягу зэрырихьар нэрылъагъут.

ЩIэблэр зыхэт Iуэхур даIыгъыну абы къеблэгъат Музыкэ театрым и солистхэу ЦокIыл Азэмэт, Габоевэ Зухра, ПащIэ Маринэ, ДыщэкI ФатIимэ сымэ. Абыхэм ягъэзэщIащ сабийхэм фIыуэ ялъагъу таурыхъхэм хэт уэрэдхэр. Пэшым щIэс цIыкIухэр хэти а уэрэдхэм дежьуурт, хэти къыдэфэрт. Гухэхъуэт а цIыкIухэр зэрынасыпыфIэр плъагъуну.

ТЭРЧОКЪУЭ Дисэ.