Нальчикде сабий чыгъармачылыкъны «Эрудит» арасында Тиширыуланы шахар советини себеплиги бла къууанчлы тюбешиу къуралгъанды. Ол Малкъар халкъны жангырыууна жораланнганды. Анга КъМКъУ-ну преподавательлери бла студентлери, устазла, школчула, аланы ата-аналары да къатышхандыла.
Тюбешиуню тиширыуланы Нальчик шахар советини таматасы Лидия Дигешева ачханды. Ол быйыл Устазны эмда насийхатчыны жылы болгъаны бла байламлы бу байрам таулу устазлагъа жораланнганын билдиргенди. «Къарындаш халкъ, уллу къыйынлыкъ сынагъан эсе да, жигерлигин, намысын, тилин, ариу адетлерин тас этмегенди, бюгюн да айныуну жолунда таукел атламла этеди. Анга уа устазла да кеслерини юлюшлерин къошадыла», – деп, ол жамауат биригиу, устазлагъа жоралап, быйыл дагъыда талай жумуш бардырлыгъын эсгертгенди.
Долинскде Малкъар халкъны кёчгюнчюлюкде азап чекгенлерине деп ишленнген мемориалны директору Теммоланы Фаризат, «Заман» газетни корреспонденти, КъМР-ни сыйлы журналисти Холаланы Марзият да таулуланы байрам кюню къалай бла тохташдырылгъаныны, аны магъанасыны юсюнден кёп юлгюле келтирип айтхандыла. Фаризат республиканы билим бериуюн бла маданиятын айнытыугъа уллу къыйын салгъан Чеченланы Шамилни, Марзият да Шыкъыда биринчи устаз эмда мектепни директору болуп ишлеген атасы Холаланы Далхатны, кеси заманында сабийлени окъутхан анасы Шапийни юслеринден да хапарлагъандыла.
Ол кюн концерт программа да бек иги къуралгъанды. Аны КъМР-ни сыйлы артисткасы Ирина Даурова, КъМР-ни халкъ поэти Созайланы Ахматны «Андан сора не керекди» деген назмусуна къурашдырылгъан жыр бла ачханды. Ол юйретген «Кавказны сабийлери» жырчы къауум а къабарты, малкъар, орус тилледе жырлагъанды. Базаланы Аслан, Мокъаланы Имран бла Рахайланы Мариям да ариу ауазлары бла келгенлени къууандыргъандыла.
КъМКъУ-ну институтунда окъуй тургъан къызла устаз болургъа не ючюн сюйгенлерин билдиргендиле.
Ахырында саугъалау болгъанды. Тиширыуланы шахар совети жаш жырчыланы белгилегенди. Базаланы Аслан а республикалы конкурсда биринчи болгъаны ючюн эришиуню бек даражалы саугъасына тийишли болгъанды.
Улбашланы Джамиля.
