Нальчикде спорт микс-файтдан клубла аралы турнир къуралгъанды. Микс-файт – ол единоборстволаны шёндюгюлю, къатыш эм игилендирилген тюрлюсюдю, анга уруу, бууу эм ачытыу приёмла барысы да киредиле.

Эришиуге Шимал Кавказны регионларындан 200-ге жууукъ гёжеф къатышхандыла, бизни республиканы атындан «Барс-Тырныауз» академияны келечилери сермешгендиле. Тюбешиуле къыйын болгъанларына къарамай, ала сегиз алтын, алты кюмюш, сегиз да доммакъ майдал къытхандыла. Аланы талайы уа, эки ауурлукъ къауумда – кеслерини эм андан аууруракъ - эрише, экишер майдал да алгъандыла.

Алай бла чемпион бел баулагъа Имран Веркин, Алботланы Даулет бла бла Дауут, Локияланы Къууанч, Габоланы Дамир, Алибек Сижажев, Тенгиз Мугуев бла къауумну баш тренери Этезланы Владимир тийишли болгъандыла. Экинчи жерлеге Тилланы Къууанч, Мухаммат Кунашев, Этезланы Мансур, Ибрагим Готыжев, Тамерлан Мугуев, Кучменланы Халит чыкъгъандыла. Габоланы Дамир, Тамерлан Мугуев, Амир Афаунов эм талай башха спортчу ючюнчю жерни алгъандыла. Гёжефлени тренерле Этезланы Владимир, Муса Шогенов, Ёзденланы Тамерлан, Виолетта Шпанагель юйретедиле.

Кульчаланы Зульфия.