Къабарты-Малкъар къырал университет «Приоритет 2030» деген къырал прогрмманы чеклеринде республиканы экономика бёлюмюн байыкъландырыргъа ахшы къошумчулукъ этеди. Ол санда бизнесге, бютюнда промышленность бёлюмде уруннган биригиулеге илму-излем эм сынау-конструктор проектлени бардырыргъа болушады.  

Аны чеклеринде финансла, кредит эм экспорт жаны бла специалист Беслан Каншаов башчылыкъ этген КъМКъУ-ну трансфер технологияла офисини башламчылыгъы бла быйыл КъМКъУ-ну илму-излем жаны бла проректоруну къуллугъун толтургъан Светлана Хаширова, вузну башха алимлери, республиканы предпринимательлери да къатышып тюбешиуле ётгендиле.

Кёп болмай аллай бир тюбешиу Бахсан районда «Центр Питомник» биригиуде бардырылгъанды. Бюгюнлюкде предприятие терек зыгытла ёсдюрюп кюрешеди. Аны бла бирге продукцияны жарашдыргъан, асырагъан жерлери эм керек энчи техникасы да барды.

Университетни алимлери питомникде суу сугъаргъан системаны тинтирча, жангы тёлю сорбентле, семиртгичле къурарча, производствону кезиуюнде жыйылгъан къалгъан-къулгъанланы жарашдырырча эм акъыллы   агросистемала ишлерча проектлеге энчи бургъандыла.  

Биригиуню таматасы Алексей Дячкин айтханнга кёре, ала вуз бла байламлыкъ жюрютюрге эм промышленный бёлюмню айнытырча жаш алимлеге не жаны бла да болушургъа хазырдыла. 

Светлана Хаширова КъМКъУ илму жаны бла ахшы сынам жыйгъанын аны предприятияланы себеплиги бла жашауда бардырыргъа жараса бизнесге ахшы себеплик этеригин билдиргенди.    

- Бусагъатда бизнес бла илмуну арасында байламлыкъны къураргъа КъМКъУ-ну трансфер технологияла офиси иги болушады. Мындан арасында да ол бютюн кючлене барыр деп ышанама. Биригиуде коллегаларыбыз бизни бла байламлыкъда ишлерге сюйгенлерин айтхандыла, - ол жаш алимле кеслерин ачыкъларча болмагъанча ахшы онгду, - дегенди проректор. 

Быллай жолоучулукъла илму жаны бла магъаналы соруулагъа эс бурургъа, промышленный бёлюмде болумну ачыкъларгъа эм бизнес-технологияланы жангы излемге кёре айнытыргъа онг тапдырадыла. 

Тюбешиуде илму бла бизнесни байламлыгъыны къыматлыгъы сюзюлгенди. Анга кёре, агропромышленный комплексде импорт производствону орунуна кесибизни материалла бла технологиланы ишлетип башларгъа эм игилендирирге келшигендиле. 
 

Бизни корр.