Къэбэрдей-Балъкъэрым футболымкIэ и гуп нэхъыщ-хьэм щекIуэкIа щIымахуэ зэпеуэм и кIэух зэIущIэхэр зэхэтащ. ИпэкIэ хъыбар зэрывэдгъэщIауэ, абы япэ, етIуанэ увыпIэхэр щызыубыдахэр нэхъ пасэу белджылы хъуат. Иджы ещанэр зыIэрыхьари наIуэщ.
Зэхьэзэхуэм зэрыщIадзэрэ бжьыпэр зымыутIыпща икIи зы-ри зытемыкIуэфа «Автозапчасть»-м иужь зэIущIэми бжыгъэшхуэкIэ 6:1-уэ Налшык и «Мурбек-ФШ»-р хигъэщIащ. Гу лъытапхъэщ, илъэс блэкIам бахъсэндэсхэр ди республикэм иригъэкIуэкIа гъэмахуэ чемпионатми зэрыщынэхъ лъэщами Кубокри къызэрихьами. Абы къегъэлъагъуэ гъэм и лъэхъэнэ псоми щытепщэ гуп лъэщ Бахъсэн къалэм зэрыщызэфIэувэжар.
ЕтIуанэ увыпIэр пасэу зыIэрызыгъэхьар Зеикъуэ къуажэ и «Шагъдийрщ». КIэух зэIущIэм ар Къэрэгъэш и «Иналым» 2:3-уэ къыхигъэщIами, езым зэран къыхуэхъуакъым, ауэ я хьэрхуэрэгъухэр гуп нэхъыщхьэм зэкIэ къыхэнэнымкIэ сэбэп хъуащ.
МыгурыIуэгъуэр ещанэ увыпIэр къэзыхьынурат. Домбеякъ медалхэм нэхъ пэгъунэгъур Налшык и «ГорИс» командэрат. Иужь джэгугъуэм ар темыкIуэу хъунутэкъым «Псыгуэнсуми», 3:2-уэ хигъащIэри, ещанэ хъуащ.
Адрей зэIущIэхэр мыпхуэдэу иухащ: «Тэрч» (Тэрч) - «Искра» (Алътуд) - 1:1, «Локомотив» (Налшык) - «ХьэтIохъущыкъуей» (ХьэтIохъущыкъуей) - 0:0, «Бабугент» (Бабугент) - «Шэджэм-2» (Шэджэм-ЕтIуанэ) - 4:1, «Ислъэмей» (Ислъэмей) - «МАХ» (Малкэ) - 0:3, «КъБКъУ» (Налшык) - «Спартак-Д» - 1:4.
Зэхьэзэхуэм кърикIуахэм уахэплъэмэ уолъагъу топ нэхъыбэ хьэрхуэрэгъухэм я гъуэм дэгъэкIынымкIэ къыхэжаныкIар «Автозапчасть» командэрауэ зэрыщытыр. Ар 65-рэ мэхъу. Абы кIэлъокIуэ «Шагъдийр» - 48-рэ. Ещанэр «ГорИс»-щ - 39-рэ. Нэхъ мащIэ дыдэу ар къызэхъулIар «КъБКъУ»-рэ «ХьэтIохъущыкъуеймрэщ». Дэтхэнэми 16-рэщ апхуэдэ гуфIэгъуэ зэрилъэгъуар. Зи гъуэр нэхъ быдэу зэтезыIыгъар «Тэрч» командэращ - абы къыхудагъэкIар топи 10-щ. АдэкIэ къыкIэлъокIуэ «Автозапчасть»-мрэ «Шагъдиймрэ». ТIуми, щхьэж къылъысу къыхудагъэкIар топ 13-щ зэрыхъур.
Нэхъ бжыгъэшхуэ здэщыIа зэIущIэр «Шагъдиймрэ» «КъБКъУ»-рэ я дежщ. Зеикъуэдэсхэм 10:0-у студентхэр хагъэщIащ.
Зэи хамыгъэщIар «Автозапчасть»-м и закъуэщ. Абырэ гъэ кIуам зэхэта щIымахуэ зэпеуэм бжьыпэр щызыубыдауэ щыта «Тэрчымрэ» зэрытегъэкIуакъым. А зэращ бахъсэндэсхэм очко бжыгъэ гуэр щафIэкIуэдар.
«Шэджэм-2» командэм зэрытемыгъэкIуэныгъэр зищIысыр ищIакъым. КъыхамыгъэщIауэ е я хьэрхуэрэгъухэм емыфIэкIауэ ар джэгупIэ губгъуэм къыщикIыжа къэхъуакъым.
Гъуащхьауэхэм я зэпеуэм бжьыпэр щиубыдащ «Шагъдийм» и пашэ Бэлагъы Русланщ. Ар 23-рэ къыхэжаныкIащ. Абы кIэлъокIуэ топ 17 дэзыгъэкIа Бажэ Амир («Автозапчасть»). Ещанэ увыпIэр зэдагуэшащ Урыс Аслъэнрэ («ГорИс») Иуан Азрэтрэ («Искра»).
Республикэм тэмэму къызэгъэпэща топ джэгупIэ зэримащIэм къыхэкIыу зэIущIэхэр къанэ щIагъуэ щымыIэу «ДыгъафIэ къалэм» и стадионым щызэхэтащ. КъызэгъэпэщакIуэхэр абы и лъэныкъуэкIэ зэрыщымыуар наIуэщ. ДжэгупIэ губгъуэм ираубгъуа IэрыщI алэ-рыбгъу щхъуантIэм стадионыр игъэдахэ къудей мыхъуу, псом я щхьэрати, я зэфIэкI нэсу къагъэлъэгъуэну футболистхэм Iэмал къаритырт. Уэздыгъэхэм нуру къагъэнэхурти, кIыфI хъуами зэIущIэр къызэтрагъэувыIэртэкъым. Зэрыджэгухэм ИнтернеткIэ укIэлъыплъ хъуну щытами, дунейр щIыIами дэщIакIуэ мащIэ къекIуэлIауэ пхужыIэнукъым. КIэщIу жыпIэмэ, зэхьэзэхуэр екIурэ-ещхьу къызэгъэпэща хъуауэ къэплъытэ хъунущ.
ШАФИЙ Аслъэн.
Сурэтыр Уэлджыр Артур трихащ.