Иджырей мардэхэм тещIы­хьауэ амбулаторэ екIу щаухуэ Бахъсэн районым хыхьэ Куба къуажэм. Медицинэ Iуэху­щIа­пIэщIэр зэблэкIы­гъуи­тIу лэ­жьэнущ икIи махуэм къриу­быдэу абы цIыху 90-м нэблагъэм дэIэпыкъуныгъэ­хэр щагъуэтыфынущ.

Унэм хэтынущ унэтIыныгъэ зэ­хуэмыдэхэмкIэ дохутырхэр щы­лажьэ, цIыхухэм медицинэ Iуэхутхьэбзэхэр щыхуащIэ, сымаджэхэм махуэм къыщеIэзэ пэш щхьэхуэхэр, «ДэIэпы­къуэгъу псынщIэм» и къудамэр.
Иджыпсту лажьэ амбулаторэм и унэр 1948 гъэм ящIауэ щытащ, кхъахэ дыдэ хъуащ. Ар яухуэ «ЦIыхухэм япэ медицинэ дэIэпыкъуныгъэхэр щрат IуэхущIапIэхэр къэгъэщIэрэщIэжын» щIыналъэ программэм ипкъ иткIэ.
Мы зэманым ухуакIуэхэм блынхэр дращIеящ, унащхьэр тралъхьащ, иджы пэш кIуэцIхэр зыхуей хуэгъэзэн щIадзащ. Медицинэм къигъэув иджырей мардэхэм хуэщIауэ щытыну IуэхущIапIэщIэм къуажэдэсхэр зыхуэныкъуэ дэIэпыкъуныгъэ­хэр къызыхуэтыншэу щагъуэтынущ.
Ухуэныгъэр и кIэм нагъэсынущ 2023 гъэм и дыгъэгъазэ мазэм.

Тхьэхущынэ Ланэ.