«Россети Шимал Кавказ» компания былтыр Къабарты-Малкъарда электрокюч сетьлеге 36 жашау журт комплексни къошханды. Аланы барына да 9,1 МВт бёлюннгенди. Объектлени асламысы (24) Нальчикдедиле, алагъа 8,7 МВт жибериледи. Шахарны къыбыла-кюнбатыш жанында жангы микрорайоннга кёп къалмай беш мегаватт берилгенди. Анда 168 корпус боллукъду (3,5 минг фатар).

Саулай айтханда уа, былтыр компания 2,7 минг хайырланыучуну жалчытханды ток бла. Барына да 49,2 МВт жиберилгенди. Буруннгу жылны кёрюмдюсю бла тенглешдиргенде, ол онбир процентге асламды.

Электрокюч сетьлеге къошулургъа сюйгенлеге компания ол жумушну женгил тамамларгъа онг береди. Заявканы Портал-ТП.РФ сайтда къояргъа боллукъду.

Кёп фатарлы юйде къоратылгъан токну багъасыны юсюнден

Бу айны биринчисинден башлап, кёп фатарлы юйню битеулю мюлкюне къарагъанда неда аны хайырланнганда, къоратылгъан токну багъасын башха тюрлю тергеп башларыкъдыла. «Каббалкэнергода» айтханларына кёре, сёз мында эсеплеучю приборлары болмагъан юйлени юсюнден барады.

Алай бла энди алада нормативни оборудованияны кючюне кёре угъай, эсеплеучю приборлары болгъан юйледе неллай бир ток къоратылгъанын эсге алып алай чыгъарлыкъдыла. Компаниядан билдиргенлерича, ол тёлеуню юйню жумушларына къарагъан структурала (Управляющий компания, ТСЖ) жыядыла. Аллайлары болмагъан юйле уа ахчаны электрокюч бла жалчытыучу компаниягъа тёлерге керекдиле. Ол а – «Россети Шимал Кавказды».

Коммунал жумушла ючюн - борчла

Озгъан айны биринчисине алып тергегенде, Къабарты-Малкъарда коммунал жумушла бла жалчытхан организацияла 73 миллион сом борч этгендиле, деп билдиргендиле «Каббалкэнерго» компаниядан. Бир миллион сомдан артыкъ берликлери болгъан организацияланы арасында ма была бардыла: «Управляющая Компания «Нальчик», «Муниципальная управляющая компания», «Эльбрус – Сервис», «Жилсервис», «Уют», «Альтернатива», «Мегаполис», «Партнёр», «Предгорный», «УК Тырныауз плюс». Аланы барыны да тёлеу низамлары бек осалды, дейдиле энергетикле. Жууаплы ишлегенлени, чыртда борч этмегенлени арасында уа ма быланы белгилейдиле: УК «Идар», ТСЖ «Оазис», УК «Комфорт-Сервис», ООО «Эдельвейс».

Улбашланы Мурат хазырлагъанды.