Кёп болмай Къабарты-Малкъар къырал университетде Кърымны эм Севастопольну вузларыны келечилери бла тюбешиу болгъанды. Анга Кърымны федерал университетини ректоруну кенгешчиси, доцент, экономика илмуланы кандидаты, сыйлы экономист Инна Ходыкина, 

Севастопольну къырал университетини  право институтуну доценти, юридический илмуланы кандидаты Юрий Оболенский, ядер  энергетика эм  промышленность институтну химия эм химия технологияла кафедрасыны доценти, педагогика илмуланы кандидаты Светлана Федорова,

Кърымны Ич ишлерини университетини акъыл-психология болушлукъ тапдыргъан бёлюмюню таматасы,  полицияны  подполковниги Оксана Удовиченко,  Сауутланнган кючлени запасдагъы офицерлерини«Мегапир» миллет ассоциациясыны КъМР-де бёлюмюню башчысы Атайланы

Жашарбек, КъМКъУ-ну ректоруну къуллугъун толтургъан Юрий Альтудов, вузну келечилери эм башхала къатышхандыла. 

Тюбешиуню ача, Юрий Альтудов университет студентлерине, профессор-педагог кадрларына эм  башха шартлагъа  кёре Шимал Кавказда терк айныгъан вузладан бири болгъанын белгилегенди. Мындан арысында да арада байламлыкъ айный барлыгъына да бек ийнаннганын чертгенди. «Сиз бизнича  «Приоритет 2030» программагъа къатышасыз, ол себепден бир оюмгъа келяллыгъыбыз баямды. Аллай таукеллик жетишимлеге келтирмей амалы жокъду», – деп къаошханды Юрий Камбулатович. 

КъМКъУ-ну стратегиялы айныу эм тыш байламлыкъла  жаны бла проректоруну къуллугъун толтургъан  Хусейн Кушхов да вузну тарыхыны юсюнден толу хапарлагъанды. Ол санда бюгюнлюкде мында 18 мингден аслам  студент окъугъанын, 200 минг квадрат метрде билим бериу эм илму объектле орналгъанларын, тогъуз институт, медицина факультет эм  халкъла аралы бийик  школ ишлегенин да билдиргенди.  

– Тыш къыраллы студентлени саны  бла КъМКъУ Шимал-Кавказ федерал округда  биринчи жердеди. Бусагъатда мында 45 къыралдан 2 минг  жаш адам окъуйду. Аланы кёбюсю  Индияны бла  Египетни келечилеридиле.   

Университетде илмуланы 150 чакълы доктору эм 400 кандидаты урунады. Биз эрттегили эм сынамлы вузладан бирине саналабыз. Ол себепден гуманитар,  медицина, инженер эм башха усталыкъладан да тынгылы билим беребиз, – дегенди Хусейн Сагидович. 

Бизни да сынамыбызны, жетишимлерибизни ачыкъларча шартла аз тюйюлдюле. Бюгюнлюкде Севастопольну къырал университетине 12 институт, колледж эм лицей киредиле. Мында «чагъырчылыкъ», «дендрология», «парк бла байламлы мюлк», «ландшафт агрономия», «битимлени экзотика халда ёсдюрюу» дегенча усталыкълагъа окъургъа онг барды. Бери келирибизден алгъа Никитский ботаника бахчаны таматасы, эл мюлк илмуланы доктору  Юрий Плугарь: «Къабарты-Малкъар не заманда да бизге ачыкъ болгъанды, менден салам айтыгъыз эм не тюрлю жаны бла  да  билимигизни ёсдюрюрге сюйгенигизни  билдиригиз», – деп  кёллендиргенди. Ол себепден кёп тюрлю тематика бла да  ишлерге хазырбыз.  

– Проектлени бирине кёре, студентле бла алышыныргъа умутубуз барды.  Аны бла бирге жаш алимлеге Кърымны ботаника бахчасында къыралда уллулугъу бла экинчи жерни алгъан энчи лабораторияда  флора бла  фаунаны тинтирча онг  табыллыкъды.

Мындан арысында байламлыкъда ишлерча «жол карта» жарашдырыргъа КъМКъУ-ну келечилерин кесибизде сакълайбыз, – дегенди  Инна Ходыкина. 

Юрий Альтудов да медицина, эл мюлк  эм жангы биотехнологияла жаны бла биригип ишлеуню къайматлыгъа санагъанды. 

Магометланы Сулейман.