КъБР-м и цIыхубэ художник, Художест­вэхэмкIэ Урысей Академием и академик, Урысейм и Абстракционистхэм, «Урысейм и сурэтыщIхэм я зэгухьэныгъэ» творческэ жылагъуэ союзхэм хэт Къанокъуэ Руслан и сурэт гъэлъэгъуэныгъэу мазаем и 7-м Лъэпкъ къэрал музейм къыщызэIуахам щыIащ ЩIэныгъэхэмкIэ Дунейпсо Адыгэ Акаде­мием и унафэщIхэмрэ абы хэтхэмрэ.

Гъэлъэгъуэныгъэм я гуапэу зыкъра­гъэ­хьэлIат ЩIДАА-м и щIэныгъэ секретарь нэхъыщхьэ Щхьэгъэпсо Сэфарбий, Къэбэрдей Адыгэ Хасэм и тхьэмадэ ХьэфIыцIэ Мухьэмэд, бзэ щIэныгъэхэмкIэ доктор, профессор БакIуу Хъанджэрий сымэ, нэ­гъуэщIхэми. 
Къыхэгъэщыпхъэщ Къанокъуэ Руслан и абстракцэ лэжьыгъэхэр япэу ди щIыналъэм зэрыщагъэлъагъуэр. Мазэм нэблэгъауэ екIуэкI гъэлъэгъуэныгъэм цIыху куэд къо­кIуалIэ икIи абыхэм къыхагъэщ сурэты- щIым и IэдакъэщIэкIхэр зыми хыумыгъэ­гъуэщэну зэрытелъыджэр, плъыфэхэр  екIуу зэрызэхиухуанэр, гупсысэ куу зэры­хэлъыр. 
- ЯпэщIыкIэ къэрэндащкIэ едзыгъуэхэр согъэхьэзыр. Iуэху гуэрым сыпэрыту е гъуэгу сытету си нэгу къыщIидзэнкIэ мэхъу си щхьэм къизэрыхьа теплъэгъуэр. Апхуэдэхэм деж, псори къызогъанэри, эскизыр сощI, сIэщIэ­мы­хужын папщIэ. Си гур тезагъэу ­едзыгъуэр зызогъэпэщри, ар сызэрылажьэ программэм изолъхьэ, адэкIэ плъыфэхэр зэкIуу зэхызоухуанэ. Си лэжьыгъэхэм хэтщ илъэ­ситIым щIигъукIэ сызэлIэлIа, нэхъ псын­­щIэIуэуи къызэхъулIа, - жеIэ Къано­къуэм. 
СурэтыщIым и лэжьыгъэхэр нэхъапэIуэкIэ щагъэлъэгъуащ «Панорама» художественнэ галереем, Минводы, Сочэ, Грознэ къалэхэм. Абы и IэдакъэщIэкIхэм ягъэщIэращIэ икIи зэпымычу щагъэлъагъуэ Radisson Blu (Сочэ), «Синдика» (Налшык) хьэщIэщхэм. 
Руслан зэрыжиIэмкIэ, и лэжьыгъэхэм ­щыщу сурэтищым къыщIэупщIащ, иджы­благъэ Москва щекIуэкIыну гъэлъэгъуэныгъэм хагъэхьэну. 
ЩIДАА-м и щIэныгъэ секретарь нэхъыщ-хьэ Щхьэгъэпсо Сэфарбий гу лъитащ су­-        рэ­ты­щIым и IэдакъэщIэкIхэм ярит плъыфэр Iэзэу зэрызригъэкIуфым хуэдэу зыщIыпIи зэ­рыщимылъэгъуам, Къанокъуэм и сурэтхэр телъыджэу зэрищIым, абы и лэжьыгъэхэм республикэм и гъуазджэмрэ щэнхабзэмрэ зэрызрагъэужьым. 
- Хуабжьу сигу ирихьащ «Абрэдж», «ЩIыр къызэрыунэхуар» зыфIища сурэтхэр, - къы­хигъэщащ Щхьэгъэпсом.
Псалъэм къыдэкIуэу жытIэнщи, Москва ирагъэхьыну сурэтищым ящыщщ ахэр. 

Фырэ Анфисэ.