КъБР-м и Iэтащхьэр Iуащхьэмахуэ щIыналъэм и къулыкъущIэхэм яIущIащ. Зэхуэсым кърихьэлIахэр тепсэлъыхьащ щIыпIэм зэрызиужьым, къапэщылъ къалэнхэр зэрагъэзэщIэну Iэмалхэм.
«Iуащхьэмахуэ щIыналъэр игъащIэ лъандэми бгылъэ щIыпIэу, ущыпсэунуи ущылэжьэнуи мытыншу къалъытэу къокIуэкI, - жиIащ КIуэкIуэ Казбек зэIущIэр къыщызэIуихым. - Мыбы щыпсэухэр лэжьакIуэшхуэхэщ, лIыгъэрэ хабзэрэ яхэлъу апхуэдэщ. ЩIыналъэм хуащI гулъытэр ар илъэс куэдкIэ гугъу зэрехьами епхащ. Дэ дыхуэхьэзырщ Iуащхьэмахуэ щIыналъэр, туризмэмрэ промышленностымрэ зедгъэужькIэрэ, къызэрытIэтыжыным, абы иIа пщIэр зэредгъэгъуэтыжыным».
Республикэм и Iэтащхьэм Iуащхьэмахуэ щIыналъэм щыпсэухэм фIыщIэ яхуищIащ зауэ Iуэху хэхам хэтхэмрэ абыхэм я унагъуэхэмрэ зэрызыщIагъакъуэм папщIэ. «Ди жагъуэ зэрыхъущи, хэщIыныгъэншэу хъуркъым. Дэ ди щхьэр яхудогъэщхъ Хэкур яхъумэжу хэкIуэдахэм», - жиIащ КIуэкIуэ Казбек.
ЗэIущIэр екIуэкIыху КIуэкIуэ Казбек узыншагъэр хъумэным, щэнхабзэм, туризмэм, псэупIэ-коммунальнэ хозяйствэм, инфраструктурэм и зыужьыкIэм теухуауэ кърата упщIэхэм жэуап яритащ.
Iуащхьэмахуэ щIыналъэм и щIыпIэ администрацэм и унафэщIым и къалэнхэр пIалъэкIэ зыгъэзащIэ Соттаев Къурмэн лъэпкъ проектхэмрэ щIыналъэ программэхэмрэ зэрылажьэм тепсэлъыхьащ. ЦIыхухэр зыхуей хуэзыгъазэ IуэхущIапIэхэм я мылъкум хъарзынэу хагъахъуэ. Егъэджэныгъэм, щэнхабзэм, узыншагъэр хъумэным елэжь IуэхущIапIэ 12 зэрагъэпэщыжащ, псыр жылэхэм яхуэзышэ IуэхущIапIэу 7, цIыху зэхэзекIуапIэу 21-рэ зыхуей хуагъэзащ. УФ-м и Президент Путин Владимир и унафэкIэ Азау деж щегъэжьауэ Терскол нэс уэсукхъуэм ущызыхъумэ Iэмэпсымэхэр Iуагъэуващ. 2022 гъэм щIыналъэм и библиотекэ нэхъыщхьэр зэрагъэпэщыжащ, апхуэдэ дыдэу зэрахьащ Тырныауз дэт езанэ лицейр, Гундэлэн дэт щколыр, спортзали 2. Сабий IыгъыпIэхэм хьэкущIэу 7 щагъэуващ, Герхожан-Суу псыежэхым лъэмыж тралъхьащ.
Дызэрыт илъэсым ЩэнхабзэмкIэ унэр зэрагъэпэщыжынущ, къат куэду зэтет унэу 17-м щIэт лифт 30 щIэкIэ яхъуэжынущ. Республикэм и Iэтащхьэм и унафэкIэ а Iуэхур ежьакIэщ. Илъэсыр имыкI щIыкIэ, Азаурэ Эльбрус жылагъуэмрэ я зэхуакум щахъуэжынущ къагъэсэбэпа псыр зэрыIуаш бжьамийхэр. Жылагъуэм иджыри амбулаторэщIэ щаухуэ, 2023 гъэм ЩэнхабзэмкIэ унэрэ спорткомплексрэ дащIыхьынущ.
Илъэсищым и кIуэцIкIэ километр 22-рэ зи кIыхьагъ гъуэгухэр ядыжащ, километри 10-м уэздыгъэхэр щагъэуващ. Илъэсыр имыкI щIыкIэ зыхуей хуагъэзэну я мурадщ Бахъсэн Ипщэм, Эльбрус жылагъуэм, «Джантуган» альпинист лагерым екIуалIэ гъуэгухэр. Былым къуажэм псы езышалIэ Iэмэпсымэхэмрэ бжьамийхэмрэ щахъуэжынущ, псы зэбгрышыпIэу 2 щаухуэнущ.
ЩIыналъэм инвестицэ проектышхуэхэр щолажьэ. Ахэр епхащ къэрал мыхьэнэ зиIэ, Тырныауз дэт вольфрам-молибден къыщIэхыпIэхэмрэ «Эльбрус» зыгъэпсэхупIэмрэ.