КъБР-м и Правительст-вэм къыщызэщIакъуэжащ республикэм Лъэпкъ Iуэхухэмрэ жылагъуэ проектхэмкIэ и министерствэм 2022 гъэм зэфIигъэкIар. Абы хэтащ КъБР-м и Правительствэм и УнафэщIым и къуэдзэ Хъубий Марат, КъБР-м и Жылагъуэ палатэм и тхьэмадэ Берд Хьэзрэталий, министерствэм и лэжьакIуэхэр, жылагъуэ, дин IуэхущIапIэхэм я лIыкIуэхэр.
КъБР-м лъэпкъ Iуэхухэмрэ жылагъуэ проектхэмкIэ и министр КIурашын Анзор жиIащ 2022 гъэм IуэхущIапIэм, муниципальнэ щIыналъэхэмрэ дин, жылагъуэ, щэнхабзэ зэгухьэныгъэхэм-рэ и дэIэпыкъуэгъуу, лэжьыгъэ купщIафIэ куэд зэрызэфIигъэкIар. Псом хуэмыдэу абыхэм я лэжьыгъэр зыхуэгъэзауэ щытар республикэм щыпсэу лъэпкъхэр зэгурыIуэу, зэрылъытэу зэдэгъэпсэунырщ, дин зэхущытыкIэхэр егъэфIэкIуэнырщ, щIалэгъуалэр хэкупсэу къэгъэхъунырщ. А Iуэхухэр къызэгъэпэщыным нэгъабэ хухахащ сом мелуан 19,5-рэ. КъищынэмыщIауэ, КIурашыным къыхигъэщащ хамэ къэралхэм щыпсэу ди лъэпкъэгъухэм министерствэр зэпымыууэ япыщIауэ зэрыщытыр, абыхэм защIэгъэкъуэным гулъытэ хэха зэрыхуищIыр. Псалъэм папщIэ, 2022 гъэм къызэрагъэпэщащ ди лъэпкъэгъухэм я анэдэлъхубзэхэр егъэджынымкIэ онлайн-курсхэр. Апхуэдэуи хамэ къэрал къикIауэ Къэбэрдей-Балъкъэрым щыIэхэр тыншу ди гъащIэм хэгъэзэгъэным хуэгъэза Iэмал псо-ри IуэхущIапIэм къегъэсэ-бэп. Ахэр къызэрагъэпэщ «КъБР-м жылагъуэ IуэхущIапIэхэм ядэлэжьэным теухуауэ», «Хамэ къэрал щыпсэууэ Къэбэрдей-Балъкъэрым къэкIуэжыну хуей ди лъэпкъэгъухэм дэIэпыкъуэгъу яхуэхъуным и IуэхукIэ» КъБР-м и къэрал программэхэмрэ УФ-м и къэрал цIыхубэ политикэр 2022 - 2025 гъэхэм Къэбэрдей-Балъкъэрым щыгъэзэщIэнымкIэ щыIэ Iэмалхэм япкъ иткIэ.
IэщэкIэ ЗэщIэузэда Къарухэм къулыкъу щыщIэным къыпэрыкIыжа офицерхэм я «Мегапир» лъэпкъ зэгухьэныгъэм КъБР-м щиIэ къудамэм и унафэщI Аттаев Жашарбэч къыщыпсалъэм къыхигъэщащ, дуней псор мы зэманым зыхэт гъэунэхуныгъэхэм ухэплъэмэ, къалэн нэхъыщхьэу зыхуагъэувыжыпхъэр терроризмэмрэ экстремизмэмрэ зэрыпэщIэтын хуей Iуэхухэмрэ лъэпкъхэм я зэхуаку зэрыхьзэрий къыдэмыгъэхъуэнымрэ зэрыарар. Абы теухуауэ КъБР-м Лъэпкъ Iуэхухэмрэ жылагъуэ проектхэмкIэ и министерствэм лэжьыгъэшхуэ зэрыригъэкIуэкIри жиIащ. «НКО-хэм цIыхухэм я псэукIэр егъэфIэкIуэным тещIыхьауэ ягъэхьэзыр проектхэр ягъэзэщIэным хухах ахъшэр мы гъэм хуэдэ 1,5-кIэ хэхъуащ. Апхуэдэуи министерствэм фIыщIэ хуэсщIыну сыхуейт 2022 гъэм Къэбэрдей-Балъкъэрым и илъэси 100-р гъэлъэпIэным хуэдгъэхьэзыра «Равнение на героев Отечества» Iуэхур къызэдгъэпэщынымкIэ щIэгъэкъуэн къызэрытхуэхъуам щхьэкIэ. Апхуэдэ щапхъэхэр куэду къыпхуэхьынущ», - жиIащ Аттаевым. - Мыхьэнэ мынэхъ мащIэ иджыпсту зиIэр Украинэм щекIуэкI Iуэхухэм хэтхэм защIэгъэкъуэнырщ. Мы зэманым Къэбэрдей-Балъкъэрым и бюджетым къыхигъэкIар сом мелуан 300-м щIигъуащ абыхэм яхуэгъэзауэ. Ауэ мыбдеж къыхэзгъэщынурат: мылъкукIэ къэгъэнауэ, икъукIэ мыхьэнэшхуэ зиIэщ гъэунэхупIэ щыIэ ди щIалэхэр зэрыдгъэгушхуэн Iуэхухэм елэжьынми. Ар жылагъуэ IуэхущIапIэхэм ди пщэ зэрыдэлъыр зыщыдгъэгъупщэ хъунукъым.
Налшык къалэм и щIыпIэ администрацэм и Iэтащхьэм и къуэдзэ Хурэ Тимур, УФ-м ЮстицэмкIэ и министерствэм и управленэу Къэбэрдей-Балъкъэрым щыIэм и зы къудамэм и унафэщI Гиляховэ Каринэ, Къэбэрдей-Балъкъэр Республикэм ис муслъымэнхэм я дин IуэхущIапIэм и унафэщI Дзасэжь Хьэзрэталий, Налшык округым и члисэхэм я благочиннэ Бобылёв Валентин, Дунейпсо Адыгэ Хасэм и тхьэмадэ Сэхъурокъуэ Хьэутий сымэ.
ЗэIущIэм къыщыпсэлъащ Министерствэм и лэжьыгъэм арэзы зэрытехъуэр къызэхуэсахэм къыхагъэщащ, апхуэдэуи 2023 гъэм зэлэжьынухэмрэ я мурадхэмрэ аб-деж щагъэбелджылащ. Абыхэм ящыщу къагъэлъэгъуащ мылъку къэлэжьыным темыщIыхьа IуэхущIапIэхэм жылагъуэм дежкIэ мыхьэнэ зиIэ я проектхэр къызэрагъэпэщын папщIэ зэрызыщIагъакъуэ Iэмалхэм зрагъэгъэужьынур. КъищынэмыщIауэ, УФ-м и Президентым «Урысейм лъэпкъ хабзэхэр щыхъумэнымрэ егъэфIэкIуэнымкIэ къэрал политикэм и лъабжьэм теухуауэ» и Унафэм къыщыгъэлъэгъуа къалэнхэми гулъытэ хэха хуащIынущ.
Хъубий Марат къыхигъэщащ лъэпкъ, дин зэхущытыкIэхэм зегъэужьын и лъэныкъуэкIэ министерствэм къалэнышхуэ зэригъэзащIэр, абы иригъэкIуэкI Iуэхухэр зэгурыIуэныгъэм, гуапагъэм, лъэпкъ хабзэхэмрэ щэнхабзэмрэ хъумэным зэрыхуэгъэзар.
БАГЪЭТЫР Луизэ.