Онтёртюнчю февральда Нальчикни шахар библиотекасыны Къулий Къайсын атлы орамда орналгъан бёлюмюнде. Китапланы саугъалауну халкъла аралы кюнюне аталып, Кавказ жазыучуланы клубуну Къабарты-Малкъарда бёлюмюню тюбешиую болгъанды.
Аны ишине республикада, андан тышында да белгили жазыучула, назмучула къатышхандыла. Ол санда Болатланы Юруслан, Светлана Алхасова, Фарида Кудаева, Радима Нагоева, Фатима Маржохова, Марианна Маргушева, Газаланы Амина, Сарбашланы Азнор. Жыйылыугъа чакъырылгъан сыйлы къонакъ КъМР-ни, КъЧР-ни да халкъ поэти Созайланы Ахмат эди.
Ары дагъыда Нальчик шахарны мектеплеринден адабиятха сейирлери болгъан, къауум окъуучу да келгенди.
Тюбешиуню бёлюмню таматасы Османланы Хыйса ачханды эм бардыргъанды. Ары келгенлени бир бирлери бла шагъырей этгенден сора, бу жумушха библиотеканы ишчилерин да къошханды. Андан сора уа сёзню Созай улуна бергенди.
Ахмат жашау, чыгъармачылыкъ жолларыны юсюнден айтханды. Библиотекагъа саугъагъа келтирген, буруннгу жыл чыкъгъан «Кюнюмю, кечеми да китабы» деген сайлама чыгъармаларындан къуралгъан китабындан къауум назмусун ёз тилинде кёлден айтханды.
Ызы бла келгенле орус, къабарты, малкъар тилледе назмула, къысха хапарла окъугъандыла. Сарбашланы Азнор а къыл къобузун алып келген эди да, аны согъуп жырлагъанды.
Ахырында жызыучула библиотеканы таматасы Амина Бажевагъа, къол салып, келтирген китапларын саугъалагъандыла.
Лейлун улу Х.