Сабийлени бла жаш адамланы «Биринчилени атламлары» битеуроссей биригиулерини биринчи бёлюмюню кезиулю ачылыуу Нальчикде «Локомотив-Грин-Хил» Клубда ётгенди. Анга жораланнган жыйылыугъа КъМР-ни Парламентини Председателини орунбасары Мурат Карданов, КъМР-ни жаш тёлюню ишлерини жаны бла министрини орунбасары Ахметланы Артур, КъМР-ни спорт министерствосуну таматасыны орунбасары Заур Хежев эм регионда сабийлени бла жаш тёлюню биригиуню башчысы Аслан Шипшев къатышхандыла.
– Жаш спортчуларыбыз да, биригиуге къошулуп, ата журтларына жараргъа итиннгенлерин кёргюзтедиле. Бу клубха келген жаш адамла барысы да алчыла болур муратлыдыла. Алай бла «Биринчилени атламларына» къошулуп, кертиси бла да ал сатырлада болгъанларын кёргюзтедиле, - деп чертгенди Мурат Карданов.
Жыйылыуну кезиуюнде спортчула къонакълагъа къалай жарау этгенлерин кёргюзтгендиле эм концерт программа къурагъандыла.
-Жаш адамларыбыз бу проектге къатышханлары бла кеслерини ниетлерин ачыкълайдыла. Алагъа «Биринчилени атламлары» проектге къошумчулукъ этерге онг бериледи,- дегенди Аслан Шипшев.
Эсигизге салайыкъ: сабийлени бла жаш тёлюню битеуроссей къымылдауу РФ-ни Президенти Владимир Путинни башламчылыгъы бла былтыр къуралгъанды. Анга «Биринчилени атламлары» деген ат атауну юсюнден оноу а биригиуню былтыр декабрьде Москвада бардырылгъан 1-чи съездинде къабыл этилгенди. Ол ёсюп келген тёлюню бирикдирир, фахмуларын айнытыр, билимлерин ёсдюрюр, усталыкъ сайлаугъа да себеп болур мурат бла къуралгъанды.
Холамханланы Алима.