Къэбэрдей-Балъкъэрым Лэжьыгъэмрэ социальнэ дэIэпыкъуныгъэмкIэ и министерствэм щыхэплъэжащ 2022 гъэм а IэнатIэм щызэфIагъэкIахэр, дызыхыхьэ илъэсым ялэжьынухэри абдеж щагъэбелджылащ. ЗэIущIэм хэтащ республикэм и Правительствэм и УнафэщI Мусуков Алийрэ абы и къуэдзэ Хъубий Маратрэ.
IуэхущIапIэм и унафэщI Асанов Алим тепсэлъыхьащ 2022 гъэм къриубыдэу гулъытэ нэхъыбэ зыхуащIамрэ зи яужь итахэм ящыщу нэхъ зыщехъулIахэмрэ.
КъБР-м Лэжьыгъэмрэ социальнэ дэIэпыкъуныгъэмкIэ и министерствэм мазищ къэс къепщытэж бюджетым пыщIа IэнатIэхэм Iутхэм я лэжьапщIэр зэрыIэрагъэхьэ щIыкIэр зыхуэдэр. Апхуэдэу, 2022 гъэм къриубыдэу, IуэхущIапIэ 500-м щIигъум улахуэр зэрыратыжа щIыкIэр щызэхалъхьэжым, IупщI къэхъуащ зи гугъу тщIы IэнатIэхэм Iутхэм я лэжьапщIэр, ику иту къатщтэмэ, проценти 8-кIэ республикэм зэрыщыхэхъуар.
Министрым и псалъэм тетщIыхьмэ, гъэ кIуам КъБР-м зи къару илъыгъуэхэм ящыщу, лэжьапIэ Iумытхэм я бжыгъэр зэрыщыхъуар процент 1,7-м нызэрыхьэсщ (зи гугъу ищIыр апхуэдэ IуэхукIэ закъыхуэзыгъэзахэрщ). Ар 1,5-кIэ нэхъ мащIэщ 2021 гъэм зэрыщытам нэхърэ.
Украинэм щекIуэкI Iуэхугъуэ пыухыкIахэм хэтын папщIэ, республикэм щыщу ираджахэм зи гугъу тщIы министерствэм 2022 гъэм и фокIадэм къыщыщIэдзауэ мазэ къэс ахъшэ яхухегъэкI. КъинэмыщIауэ, Херсон областым къикIыу пIалъэкIэ ди щIыналъэм щыпсэуну къэкIуахэми защIегъакъуэ.
Нэгъабэ къриубыдэу, КъБР-м и бюджетым къыхэкIыу, республикэм лэжьапIэншэу къыщалъытахэм, псори зэхэту, сом мелуан 227,2-рэ хухахащ.
Асанов Алим зэригъэбелджыламкIэ, зи пашэ IэнатIэм гъэ кIуам дэIэпыкъуныгъэкIэ къащыгугъхэм къабгъэдэкI лъэIу тхыгъэу 682-рэ къыIэрыхьащ. Ахэри яхэту, социальнэ и лъэныкъуэкIэ зызыщIагъэкъуахэм, псори зэхэту, сом мелуан 238-рэ сом мин 852-м нэблагъэ иратащ. Зауэ зэпIэщIэувэныгъэм зи щIалэ хэкIуэда унагъуэ 84-м ящыщ дэтхэнэми сом мелуан зырыз Iэрагъэхьащ. УIэгъуэ зыгъуэта 461-м, псори зэхэту, сом мелуани 138,3-рэ иратащ.
Бын куэд зиIэ унагъуэхэм ящыщу 600-м мазэ къэс зэрызыщIагъэкъуэнум щыхьэт техъуэ сетрификатхэр Iэрагъэхьащ, нэхъ хуэмыщIахэм ящыщу 166-м, псори зэхэту, сом 41250-м нэблагъэ иратащ.
БЭРАУ Бышэ.