КъМР-ни Башчысы Казбек Коков Къабарты-Малкъарны Жамауат палатасыны таматасы Хазратали Бердов бла ишчи тюбешиу бардыргъанды. Ушакъны кезиуюнде регион Жамауат палатаны 2022 жылда ишини эсеплери сюзюлгендиле.
Хазратали Бердов билдиргеннге кёре, КъМР-ни Жамауат палатасы кесини ишинде жамауат биригиулени къыйматларын кётюрюуге, власть органла, муниципал къуралыуланы жамауат советлери бла байламлыкъланы кючлеуге, РФ-ни Жамауат палатасы бла бирге ишлеуню тап къураугъа энчи эс бурулгъанды. Аны жыйылыуларында республиканы адет-тёрелерин, маданият хазналарын сакълауну, ёсюп келген тёлюню Ата журтха кертичи болургъа юйретиуню, Уллу Ата журт урушну тарыхын тюз халда сакълауну амаллары сюзюлгендиле.
Социал болушлукъну кёбейтиу, предпринимательликни айнытыу, муниципалитетлеге оноу этиуню игилендириу, акъылбалыкъ болмагъанланы араларында аманлыкъ ишлени болдурмау да баш магъаналы жумушлагъа саналып келедиле. Жаш тёлю политиканы, билим бериуню эмда саулукъ сакълауну юсюнден да кёп кере сёлешиннгенди. Инсанладан келген тарыгъыулагъа энчи эс бурулгъанды. Жамауат палатаны тийишли комиссиялары республиканы социал бёлюмюн бла экономикасын айнытыу бла байламлы 60-дан артыкъ сорууну кётюргендиле, эсгертиулерин власть органлагъа жибергендиле.
Былтыр апрельде КъМР-ни Жамауат палатасыны къаууму Россейни Президенти Владимир Путинни энчи аскер операцияны бардырыуну юсюнден оноуу жанлы болгъанларын билдиргендиле. Аны бла да къалмай, госпитальлада жаралы аскерчилени жокълау бла жандауурлукъ ишле къурагъандыла, Россей Федерацияны Къырал байрагъыны кюнюнде Херсон областьда да болгъандыла.
Казбек Коков Хазратали Бердовха эмда КъМР-ни Жамауат палатасыны къауумуна магъаналы иш бардыргъанлары ючюн жюрек ыразылыгъын билдиргенди. Келир кезиуде тамамланыллыкъ ишлени юслеринден айтханда уа, миллет проектле къалай толтурулгъанларына жамауатны жанындан контрольну кючлендириу эмда жаш тёлюню жамауат ишлеге тири къатышдырыу баш борчладан бирлерине саналгъандыла.
КъМР-ни Башчысыны бла
Правительствосуну
пресс-службасы.
