Тюнене Къабарты-Малкъар къырал аграр университетде, Илмуну кюнюне жоралап, «Биринчилени атламлары» деген битеуроссей сабий эм жаш тёлю къымылдауну бёлюмю ачылгъанды. Ары дери уа анда тюрлю-тюрлю темалагъа 9 практика майданла ишлегендиле. Алагъа жаш тёлю сейирлерине кёре юлешиннген эди.
Къууанчлы ишге КъМР-ни жаш тёлюню ишлери жаны бла министрини орунбасары Татьяна Асыкина, университетни ректору Аслан Апажев эм «Биринчилени атламлары» биригиуню КъМР-да бёлюмюню таматасы Аслан Шипшев къатышхандыла.
Жыйылгъанланы алларында сёлеше, Аслан Апажев бюгюнлюкде ёсюп келген тёлюню тюз ниетде, патриот сезимде юйретиу артыкъда магъаналы болгъанын чертгенди. Быллай къымылдауну къуралгъаны уа бу ишге не жаны бла да уллу себеплик этериги сёзсюздю, дегенди.
– Къырал тамата кеси быллай ишни магъаналыгъа санап, онгла къураргъа буйрукъ этгени кёпню юсюнден айтады. Бюгюн Илмуну кюнюнде Россейни 100-ден артыкъ бийик билим берген окъуу юйюнде быллай биринчи бёлюмлени ачыу жумушла бардырылгъанлары да бошдан тюйюлдю. Жаш тёлюню не жаны бла да бирикдириуню магъанасы бек уллуду, - деп къошханды Аслан Каральбиевич.
Аслан Шипшев а декабрь айда Москвада бардырылгъан биринчи съездни юсюнден къысха хапар айтып, КъМР-ни Башчысы Казбек Коковха ыразылыгъын билдиргенди.
– Ары регион таматаланы барысындан да алгъа Казбек Валерьевич келген эди. Ол бизге энчи эс бёлюп, кёлюбюзню кётюргени барыбызны да эсибизде къалгъанды. Бюгюн да бу бёлюмню ачылыуу бек магъаналыды бизге. Саулай къыралны сабийлерини быллай жумушну тёгерегинде бирикгенлери аланы адеп-къылыкъгъа юйретиуге себеп боллугъу ишексизди, – деп белгилегенди Аслан Шипшев.
Ызы бла уа жыйылгъанланы алларында университетни жаырчылары бла тепсеучюлери кеслерини фахмуларын кёргюзтгендиле.
Таппасханланы Аминат