Тыркум щыпсэу адыгэ тхьэмадэхэм ящыщ зым зэгуэрым зыхуагъэзат адыгэр адрейхэм къазэрыщхьэщыкI нэщэнэхэр къахурибжэкIыну. НэхъыжьыфIыр хэгупсысыхьащ, зыхилъэса гупсысэ куухэм, зи адэжь лъахэ зыбгынэу хамэ щIыналъэхэм къыщыхута тхьэмыщкIэхэм я фэм дэкIа гугъуехь псори и нэгу щIэрыщIэу щIэкIыжым ещхьу и нэгур къызэхэуфащ, зэпишачэ псалъэхэм я мыхьэнэр зэрызыхищIэри къыхэщу щым хъуащ.
«Дунейм лъэпкъыу тетыр къэзыгъэщIар Тхьэращ, я Iэпкълъэпкъ пщыкIутIкIи зэхуэдэщ, ирипсэлъэну бзэ зэраIуилъхьамкIи зэщхьэщыкIыркъым, ялэжьым кърикIуэнур зыхуэдэр зэрагъэзэхуэну акъыл къазэрыритыжамкIи зэщхьщ. Ауэ дэтхэнэми щIыгу зырызыххэ яритащ, абы хуэфэщэн дуней зыхэщIи ябгъэдилъхьащ, а псор къызэриIуэтэн анэбзи яIурилъхьэжащ. Хэти еупщI, щалъхуа лъахэм хуэдэ щымыIэу жиIэнущ. Адыгэхэри дынэхъ лейкъым – дыкъызыхэхъукIа щIыгужьым ипэ идгъэщ къэхъуакъым, абы дыщIыщIэзэуари аращ. Адыгэр кърипцIыхуну нэщэнэ зыбжанэ щыIэщ. Анэбзэр IэщIэхуами, лъэпкъым щыщу зыкъэзылъытэж дэтхэнэ зы адыгэми и адэцIиблыр ищIэнущ, ар зыуэ. ЕтIуанэрауэ, а адэжьхэр щыпсэуа щIыпIэхэм щыгъуэзэнущ, зэрахьэ фIэщыгъэхэмкIэ ицIыхунущ. Ещанэрауэ, Ажджэрий и къуэ Кушыкупщ зи хэтымрэ зэрихьа лIыгъэмрэ фIэкIыпIэ имыIэу хищIыкIынущ», – жиIащ, гупсысэм къыхэкIыжу. Хъыбарыр кIыхьщ, ауэ нэхъыщхьэр илъэсищэрэ щэ ныкъуэм щIигъужауэ хамэщI щыпсэу адыгэхэм лъэпкъыщхьэм и нэщэнэхэр къыщыхагъэщкIэ, я къуэпсхэр Iэмалыншэу адэжь лъахэм къызэрадзырщ, къащIэхъуа щIэблэм я гупсысэри хъуапсэри абы къызэрырапхырщ. Гугъэр адэжь щIэинщ, жаIэ. Зэгуэр IэмалыншагъэкIэ къызэранэкIа адэжь хэкум жьакIэпэ нэпсыр хущIагъэкIыу, пыхьэу зи дуней Iыхьэр зыхъуэжа тхьэмыщкIэхэм я щIэблэт иджы апхуэдэ гупсысэхэр зэкIэлъызыгъакIуэр, лъэпкъ гугъапIэхэр зэхэзымыгъэкIыжыр.
Апхуэдэ гъэсэпэтхыдэкIэ гъэнщIа адыгэ Iущыгъэхэм къигъэщIащ ХьэтIохъущокъуэ Къазий и цIэр зезыхьэ Адыгэбзэ Хасэм иджыблагъэ иригъэкIуэкIа, щIыпIэхэм я фIэщыгъэмрэ тхыдэмрэ зэхуэхьэсыжыным теухуауэ Къып Мэхьмуд и фэеплъу зэхаша «Лъахэеджэ» дунейпсо щIэныгъэ-узэщIакIуэ зэхуэс-зэпеуэр. ХамэщIым зи гъащIэ Iыхьэр щезыхьэкIа нэхъыжьхэм адэжьхэмрэ хэкужьымрэ я цIэхэм апхуэдиз Iулыдж щыхуащIакIэ, а нэрымылъагъу къуэпсхэм къыздадзыж лъахэм къихъухьыну зи насып къихьа ныбжьыщIэхэм апхуэдэ щIэныгъэ зэрабгъэдэлъри наIуэ къащIыну хущIэкъуащ къызэгъэпэщакIуэхэр. ИкIи, гуапэ зэрыхъунщи, зэрыщыгугъам хуэдэу къыщIэкIащ.
«Лъахэеджэ» фIэщыгъэ дахэр зрата зэхуэс-зэпеуэм зыхуищIыжа мурадхэм ящыщт адыгэ щэнхабзэм и къэгъэщIыгъэ зэмылIэужьыгъуэхэм щІалэгъуалэм гу лъаригъэтэныр, абы пщIэ хуищIын икIи ихъумэн зэрыхуейр къагуригъэIуэныр, лъэпкъым и блэкIам щигъэгъуэзэныр, щIыпIэхэм я фIэщыгъэмрэ я тхыдэмрэ ящIэу къэгъэтэджыныр, ар пщIэ зыпылъ Iуэхугъуэу зэрыщытыр я фIэщ ищIыныр. КъызэгъэпэщакIуэхэр хущIэкъуащ къуажэ зэмылIэужьыгъуэхэм къикIа ныбжьыщIэхэм я лэжьыгъэр зэхуэс-зэпеуэм хэт дэтхэнэ зыми зэхрагъэхыну, абы ехьэлIа псалъэмакъым къыхашэну. Апхуэдэ щIыкIэкIэ жэрдэмщIакIуэхэр хуейт Хэкум и гъунапкъэхэр ныбжьыщIэр къыщыхъуа къуажэм деж къызэрыщымыувыIэр, атIэ абы адыгэбзэкIэ псалъэ дэтхэнэ зыми и жылэр къызэрыхыхьэр зэхригъэщIыкIыну, ари дэтхэнэми я щIыгу кIапэу зэрыщытыр зыхригъэщIэну.
Зэхуэс-зэпеуэм хэтащ щIыналъэм курыт щIэныгъэ щрагъэгъуэт и IуэхущIапIэхэм я 7 - 11-нэ классхэм щеджэ ныбжьыщIэхэр. Абыхэм къахэкIащ къуажитIым, къуажищым я щIыпIэцIэхэр къэзыхутахэри, щалъхуа лъахэм епха фIэщыгъэхэр зэхуэхьэсыным къыщыувыIахэри. Ауэ дэтхэнэри хьэлэмэт ищIырт, щIыпIэцIэхэр къызэрыкIуэу зэхуадзыс къудей мыхъуу, абыхэм епха IуэрыIуатэхэр зэрызэхуахьэсыжам, нэхъыжьхэм я деж щатхыжа тхыдэжьхэр къызэрырапхэжам, архив е тхыдэ тхыгъэхэр тегъэщIапIэ къызэрыхуащIам, сурэтхэмрэ видеотеплъэгъуэхэмрэ къызэрыгуадзэжам.
Къыхэгъэщыпхъэщ щIыпIэцIэхэр зэхуэхьэсыжыныр зы махуэ лэжьыгъэу зэрыщымытыр, ар нэсу зэгъэпэща хъун папщIэ далэшхуэ дэхын зэрыхуейр. КъызэгъэпэщакIуэхэм зэрыжаIэмкIэ, утыкум кърахьахэм сабийхэр щелэжьым, ахэр егъэджакIуэхэм яунэтIым къыщымыувыIэу, унащхьэ чэзууэ нэхъыжьхэм я деж ядэкIуэу, и жыжьагъ-гъунэгъуагъым емылъытауэ бгыхэм, къуэладжэхэм, Iуащхьэхэм цIыкIухэм я гъусэу ядыдэкIыу зэрыщытар.
Къэхутэныгъэхэр езыгъэкIуэкIахэм Iуэхугъуэ куэд къалъытэн хуейт. Псом япэрауэ, ар адыгэбзэкIэ тхауэ, къыхэщ фIэщыгъэхэр зэIубзу, щыуагъэ хэмыту щытын хуейт. Абы къищынэмыщIауэ, зэхуэс-зэпеуэм и къэпщытакIуэхэм къалъытэнут лэжьыгъэм къыщыхьа щIыпIэцIэхэр, абыхэм епха тхыдэ хъыбархэр, я къэIуэтэкIэр, абыхэмрэ лэжьыгъэр зыхуэунэтIа Iуэхугъуэмрэ зэрызэпэджэж, зэрызэтехуэ щIыкIэр, зэрагъэпщэнут лэжьыгъэм и щIэщыгъуагъыр, абы хэлъ щхьэхуэныгъэхэр. ФIагъыр щызэхагъэкIкIэ, къыхалъытэнут лэжьыгъэм гуэдзэн хуащIа сурэтхэр, картэхэр, документхэр, архив тхылъымпIэхэр.
Зэхуэс-зэпеуэр щекIуэкIащ Къэбэрдей-Балъкъэрым егъэджакIуэ IэнатIэм пэрытхэм я IэщIагъэмрэ щIэныгъэмрэ щыхагъахъуэ институтым. Зэпеуэм хэтхэм Iэмал яIащ я къэпсэлъэныгъэр видеотеплъэгъуэхэмкIэ щIагъэбыдэжурэ гъэщIэгъуэну ирагъэкIуэкIыну. Ауэ, шэч зыхэмылъращи, уасэ зимыIэр сабийхэр зи гугъу ящI Iуэхугъуэхэм узыIэпишэу зэрытепсэлъыхьырт, зым нэхърэ адрейр нэхъ щIэщыгъуэжу бзэм и Iэмалхэр къагъэсэбэпурэ щIыпIэхэр уи нэгу къызэрыщIагъэувэрт. КъэпщытакIуэхэм къызэрыхагъэщащи, дэтхэнэ лэжьыгъэри гунэст, нэхъыфIыр къыпхухэмыгъэкIыу. Апхуэдэу щыт пэтми, нэхъыфI дыдэр къыщыхахым, къэпсэлъэныгъэмрэ лэжьыгъэ гъэпсыкIэмрэ къадэкIуэу, утыку итыкIэми, адыгэбзэм гушхуауэ зэрырипсалъэми еплъащ.
ЩIэныгъэ зэхуэс-зэпеуэм кърахьэлIа лэжьыгъэ псоми хэплъа нэужь, къэпщытакIуэхэм увыпIэхэр мыпхуэдэу зэщхьэщагъэкIащ:
зэхуэсым и гран-прир хуагъэфэщащ Инарыкъуей къуажэм дэт, Пэнагуэ Азэмэтджэрий и цIэр зезыхьэ курыт еджапIэм щыщ ДыщэкI Ясминэ (егъэджакIуэ-унэтIакIуэр Хьэрэдурэ Эммэщ).
Япэ увыпIэр иратащ Джэрмэншык къуажэм дэт курыт еджапIэм щыщ Соблыр Астемыр (егъэджакIуэ-унэтIакIуэр ГъукIэпщокъуэ Iэсиятщ).
ЕтIуанэ увыпIэр къуажищым къикIа ныбжьыщIэхэм зэдагуэшащ:
Камменомост (Къармэхьэблэ) дэт, Къамбий Мухьэб и цIэр зезыхьэ курыт еджапIэ №1-м щыщ Аслъэн Инал (егъэджакIуэ-унэтIакIуэр Бей Маринэщ),
Тамбовскэ къуажэм дэт, Щомахуэ Алексей и цIэр зезыхьэ курыт еджапIэм щIэсхэу КIэмпIарэ Альбинэрэ Ныбэжь Аланрэ (егъэджакIуэ-унэтIакIуэр Щомахуэ Дусэщ),
Инарыкъуей къуажэм дэт, Пэнагуэ Азэмэтджэрий и цIэр зезыхьэ курыт еджапIэм щыщ Шыдакъ Дианэ (егъэджакIуэ-унэтIакIуэр Хьэрэдурэ Эммэщ).
КъэпщытакIуэхэм ещанэ увыпIэр еджакIуэ зыбжанэм иратащ:
Дей (Мэртэзей) къуажэм дэт, Къанкъуэщ Ахьмэдхъан и цIэр зезыхьэ курыт еджапIэм щыщ Къулатэ Даринэ (егъэджакIуэ-унэтIакIуэр Уэрзей Джульеттэщ),
Бахъсэнёнкэ (Къэсейхьэблэ) дэт курыт еджапIэ №2-м щIэс Нэгъуей Тазрэт (егъэджакIуэ-унэтIакIуэр Нэгъуей ХьэIишэтщ),
Инарыкъуей къуажэм дэт, Пэнагуэ Азэмэтджэрий и цIэр зезыхьэ курыт еджапIэм щыщ Шэрий Дисанэ (егъэджакIуэ-унэтIакIуэр Хьэрэдурэ Эммэщ),
Аушыджэр (Дыгъужьыкъуей) къуажэм дэт, Къардэн зэкъуэшхэу Къубатийрэ Къэбардрэ я цIэхэр зезыхьэ курыт еджапIэм щIэс Къасым Иланэ (егъэджакIуэ-унэтIакIуэр Урыс-Шэшэн Людэщ),
Лашынкъей (Тохъутэмыщей) къуажэм дэт, Хьэгъэжей Джонсон и цIэр зезыхьэ курыт еджапIэ №2-м щыщ КIэбышэ Алинэ (егъэджакIуэ-унэтIакIуэр Тхьэгъэпсо Альбинэщ),
Зэрэгъыж къуажэм дэт, IутIыж Борис и цIэр зезыхьэ курыт еджапIэм щыщ Лий Дианэ (егъэджакIуэ-унэтIакIуэр Къалмыкъ Джульеттэщ),
Жэмтхьэлэ (Къуэжьыкъуей) Ипщэ къуажэм дэт, Шэрджэс Хьэсэнбий и цIэр зезыхьэ курыт еджапIэм щIэс Уэлджыр Алинэ (егъэджакIуэ-унэтIакIуэр Жылэ Зухращ),
Налшык къалэм дэт курыт еджапIэ №5-м щыщ Къурмэн Темырлан (егъэджакIуэ-унэтIакIуэр Къурмэн Эммэщ).
Сыт хуэдэ лэжьыгъэми щIэныгъэ тегъэщIапIэ къелъыхъуэ. Адыгэ щIыпIэцIэхэмкIэ къэхутэныгъэ инхэр ирагъэкIуэкIащ адыгэ щIэныгъэрылажьэхэу КIуэкIуэ Жэмалдин, Мэрэтыкъуэ Къасым, Темыр Рае сымэ. Шэч хэлъкъым, абыхэм я гуащIэращ лъэпкъ щIыпIэхутэ Iуэхугъуэхэм ублапIэ яхуэхъуар. Зи цIэ къитIуа нэхъыжьхэм зэхуахьэсыжахэм къызэрымыкIуэу куэд къыхагъэхъуэфащ ныбжьыщIэхэм. Псоми зэдащIэ, хэгъэгум и дэнэ къуапи щацIыху щIыпIэхэм къадэкIуэу, къуажэхэм унейуэ зэрахьэ фIэщыгъэхэр мымащIэу щыIэщ. Мис абыхэм я зэхуэхьэсыжынми лъэпкъ щIэныгъэм куэд къызэрыхигъэхъуэжыфынум и шэсыпIэхэр зэрыщыIэр мы зэхуэс-зэпеуэм къигъэлъэгъуащ.
КъызэгъэпэщакIуэхэр «Лъахэеджэм» и екIуэкIыкIэ хъуам хуэарэзыщ, дяпэкIи абы къыпащэну я гугъэщ. КъытщIэхъуэ щIэблэм зрагъэгъуэт дунейм щIэныгъэм зыкъыщилъыхъуэжын хуейуэ IэнатIэ иIэщ. Ар еджапIэм къыщIих есэныгъэхэм языхэзщ. Шэч хэмылъу, ар лэжьыгъэшхуэщ, икIи жыIэн хуейщ апхуэдэ IэнатIэр зи бзэ зыщIэжымрэ зи хэкур фIыуэ зыцIыхумрэ нэхъ къызэрехъулIэнур. Зэхуэс-зэпеуэм хэта еджакIуэхэми, ахэр зыгъэхьэзыра егъэджакIуэхэми зэфIэкIышхуэ зэрабгъэдэлъыр, къыхалъхьа Iуэхум лъагъуныгъэшхуэ зэрыхуаIэр къыщIэщащи, щIэныгъэкIи цIыхугъэкIи зэрефIэкIуэнум шэч хэлъкъым.
ХьэтIохъущокъуэ Къазий и цIэр зезыхьэ Адыгэбзэ Хасэм хэтхэм зэрыжаIэмкIэ, «Лъахэеджэ» щIэныгъэ зэхуэс-зэпеуэм щытекIуахэмрэ къыщыхэжаныкIахэмрэ къахута Хэкум и дахагъыр къызытещ щIыпIэхэм яшэу я нэгу зыщрагъэужьыну я гугъэщ.
ШУРДЫМ Динэ.