Къабарты-Малкъарда эки жюз школчу «Къоркъуусузлукъну лабараториясы» деген кёчюрюлюучю комплекс бла хайырлана жолда жюрюуню жорукъларын къатлагъандыла. Автоинспекторла жолда эки чархлы транспортда жюрюуге энчи эс бёлгендиле.

Чегем районну Яникой элини орта школуну окъуучулары КъМР-ни жарыкъландырыу эм илму министерствосуну Жолда жюрюген кезиуде сабийлеге хата тюшмезча этиуню профилактика арасыны «Къоркъуусузлукъну лабораториясы» деген программасына тири къатышхандыла. Аны чеклеринде МВД-ны Чегем районда къырал автоинспекторлары, интерактив амалланы хайырлана, башланнган класслада дерсле ётдюргендиле. Къауумлагъа юлешинип, сабийле жолда жюрюуню жорукъларына юйреннгендиле. «Эки чархлы транспорт» деген станцияда велосипедде айланнганда къоркъуусузлукъну жалчытхан белгилери бла юс кийимлени тинтгендиле. Ызы бла жолда бу транспортда баргъанда ачыгъанларыны сылтауларын ангылатхандыла.

Андан сора сабийле авариягъа тюшгеннге биринчи медицина болушлукъну къалай берирге кереклисине юйреннгендиле. Сабий шинтиклени бла къоркъуусузлукъну белбауун тагъып да кёргендиле.

Къызчыкъла бла жашчыкъла къонакълагъа сюйюп тынгылагъандыла, тюрлю-тюрлю соруула да бергендиле. Устазла да быллай дерсле уллу магъананы тутханларын белгилегендиле.

Холамханланы Алима