Кёп болмай Нальчкни 2-чи номерли лицейини окъуучулары Къабарты-Малкъар къырал аграр университетни билим бериу-производство комплексинде болгъандыла. Ол жолоучулукъну усталыкъ сайларгъа болушууну программасына кёре вузгъа дери юйретиуню, усталыкъ сайларгъа эм иш табаргъа болушууну управлениясы  «Академия путишествий» сабий туризм ара бла бирге къурагъандыла. 

Аны кезиуюнде Марина Карапышова окъуучуланы жерчилик бла кюрешген биригиуню иши бла шагъырейлендиргенди. Школчула эл мюлкде хайырланылгъан  кёп тюрлю энчи  техниканы эм оборудованияны да кёргендиле. Аланы хар бири къаллай жумушла толтургъанларын да билгендиле. Биригиуню таматасы Камалудин Магомедов а эл мюлк усталыкъланы, жерчилик жаны бла изленнген кадрланы  юслеринден да айтханды. Жаш адамла малла бла жаныуарла тургъан жерде да болгъандыла, аладан бегирек  къоянлагъа бюсюрегендиле.    
– Сабийлени кёбюсю къайсы  усталыкъны жаратханларын билмейдиле. Толуракъ ангылаулары болур ючюн алагъа болушургъа керекди. Ким биледи, бюгюннгю жолоучулукъну хайыры бла бир-бирлери  жерчиликни сайларгъа да болурла, –  дегенди 2-чи номерли лицейни устазы Русалина Бесланеева.

Сабий туризмни арасыны таматасы Зарема Курашинова да быллай ишле магъаналы болгъанларын айта, адам гитчелигинде кёргенин эм билгенин бир заманда унутмазлыгъын белгилегенди. Аны бла бирге тюрлю-тюрлю  производстволада бола тургъан сабийни окъуна жюреги бир затха тартмай къалмазлыгъын чертгенди.

Бизни корр.