МафIэсгъэункIыфI IэнатIэ
Къэбэрдей-Балъкъэрым мафIэсым пэщIэт-къегъэлакIуэ и IэнатIэм щызэхалъхьэжащ 2022 гъэм ирагъэкIуэкIа лэжьыгъэм кърикIуахэр.
Илъэс кIуам IэнатIэм и мафIэс-къегъэлакIуэ гупхэр 415-рэ дэкIащ мафIэсыр ягъэункIыфIыну. IэнатIэм и лэжьакIуэхэм республикэм мафIэс къыщыхъуа и ухуэныгъэхэм къыщIагъэIэпхъукIащ цIыху 756-рэ, цIыху 25-рэ, сом 1 мелардрэ мелуан 695-рэ и уасэ мылъку кърагъэлащ. Абы щыщу сом мелуан 530-рэ и уасэ хуэзэ мылъкур кърагъэлащ «Къэбэрдей-Балъкъэр ПСС» IуэхущIапIэм и мафIэсгъэункIыфIхэм. КъэлъыхъуакIуэ-къегъэлакIуэ гупым хэтхэр 146-рэ дэкIащ я лэжьыгъэ IуэхукIэ икIи цIыху 54-рэ кърагъэлащ, гузэвэгъуэм хэхуауэ 74-м ядэIэпыкъуащ.
МафIэс нэхъыбэ къыщыхъуащ пкъыгъуэхэр, хьэпшыпхэр, Iусыпхъэхэр, техникэр зэIухауэ щахъумэ щIыпIэхэм, апхуэдэуи псэупIэхэм. Ахэр нэхъыбэу кърикIуащ мафIэм зэрыхуэмысакъым, электроIэмэпсымэхэмрэ транспортымрэ къызэрыгъэсэбэпыпхъэ хабзэхэм зэрытемытым.
2022 гъэм кърикIуахэмкIэ «Къэбэрдей-Балъкъэр ПСС» IуэхущIапIэм и мафIэсгъэункIыфI IэнатIэ нэхъыфIу къалъытащ Лэскэн районым и Анзорей къуажэм щыIэ часть №14-р (унафэщIыр ГуэбэщIыкI Казбекщ), етIуанэ увыпIэр лъысащ Дзэлыкъуэ районым и Каменномост къуажэм и ПСЧ-17-м (унафэщIыр Бей Муратщ). Ещанэ увыпIэр хуагъэфэщащ Май къалэм и ПСЧ-6-м (унафэщIыр Алборэ Анзорщ). МафIэсгъэункIыфI-къегъэлакIуэ частхэм я унафэщIхэм я деж япэ щитщ Бей Мурат, ГуэбэщIыкI Казбек етIуанэщ, ещанэ увыпIэр хуагъэфэщащ Бахъсэн районым хыхьэ Къубэ-Тэбэ къуажэм щыIэ часть №20-м и унафэщI БжэныкIэ Анатолэ.
Къэбэрдей-Балъкъэрым мафIэсым пэщIэт-къегъэлакIуэ къулыкъум и лэжьыгъэм кърикIуахэр зэпалъытыжри, 2023 гъэм я къалэн нэхъыщхьэхэр ягъэнэIуащ.
БАХЪСЭН Азэмэт.
