Кёп болмай КъМР-ни Жарыкъландырыу эмда илму министерствосунда кезиулю жыйылыу  болгъанды, анда  миллет, регион  проектлени эм къырал программаланы  бардырыу бла байламлы эм башха соруула  сюзюлгендиле.   Анга КъМР-ни жарыкъландырыу эмда илму  министри Анзор Езаов,  КъМР-ни Праламентинде  Билим бериу, илму эмда  жаш тёлюню ишлери жаны бла  комитетини председатели Нина Емузова,   «Россельхознадзор Къабарты-Малкъар референт араны» директору Хаути Сохроков эм башхала къатышхандыла.

Быйыл ведомствону ишини,  ол санда «Билим бериу», «Демография» миллет проектлени эм башха программаланы  бардырыуну юсюнден жарыкъландырыу эмда илму    министрни орунбасары Анзор Борукаев доклад этгенди.  

Ол айтханнга кёре,  бюгюнлюкде Къабарты-Малкъарда 267 школ барды, аладан 95-си шахар эм 172-си да эл тийреледе орналадыла.   «Бюгюннгю школ»  федерал  проектге кёре,  бусагъатда 6 324 чакълы  окъуучу жюрюген объектлеге тынгылы ремонт этилип бошала турады. Аны алтыдан бири болжалындан алгъа тамамланнганды. Сёз ючюн, Прохладнада, Нарткъалада бла Кубада  мектепле жангыртылгъандыла.  Келир жылда да  4539 сабийге школла ишленирикдиле. Сёз ючюн,  Нальчикде – 1500, Баксанда- 1224,  Прохладнада -560, Красносельскоеде -500, Майскийде – 330, Сармаковода – 275 эм  Псынабода 150 адам жангы мектепледе окъурукъдула.

 Аны бла бирге гитче шахарлада бла элледе орналгъан 37 мектепде  «Точка роста»  арала да ачылгъандыла. Жангы окъуу жылдан бери ала ишлерин жетишимли бардырадыла. Алай бла  2023-2024 окъуу жыллада энтта да 60 ара къураллыкъды.

Быйыл  Нальчикни 11-чи номерли школуну мурдорунда «Кванториум» деген технопарк да  ачылгъанды эм  келир жылда дагъыда аллай  экиси боллукъду.  

«Хар сабийни жетишими»  федерал проектни чеклеринде быйыл республиканы гитче шахарларыны  бла эллерини   школларыны бир къауумунда  физкультурадан  бла спортдан жараула бардырырча  онгла къуралгъандыла.  Анга кёре, быйыл алты  районда онеки спортзалгъа тынгылы ремонт этилгенди эм аланы тийрелеринде  адамла жолну къоркъуусуз ётерча   тёрт объект  излемлеге келиширча  болгъандыла.  Келир жылда да алты спортзал бла онбир школ  жангыртыллыкъдыла  эм аланы алларында да  жаяу жюрюгенлеге тийишли онгла къураллыкъдыла.  

Быйыл «Цифралы  билим бериу» федерал проектни чеклеринде  54 школда  компьютерлерин  жангыртхандыла. Келир жыл  да 41 билим бериу учрежденияда техникаларын алышырча мадар этилликди.

Жыйылыуда «Къабарты-Малкъарда  школлада билим бериу системаны жангыртыу» регион проектни бардырыу халына  да къаралгъанды.  Анга бюгюнлюкде 59 билим бериу организация киреди. Аладан 29-су быйыл къошулгъандыла.  Проектге кёре келир жыл  отуз объектде жангыртыу ишле башланырыкъдыла.  КъМР-ни жарыкъландырыу эм илму министрини орунбасары  Екатерина Мисостова  билдиргенича, 17 школгъа тынгылы ремонт этилип бошалгъанды, экиси да бу кюнледе хазыр боллукъдула.

- Тынгылы ремонт этиу   мындан арысында да бардырыллыкъды. Саулай алып айтханда, быйыл 29 объектге къаралгъанды. Болсада план бла  2025 жылгъа аланы санын  92 школгъа жетдирир муратлыбыз,- деп къошханды Екатерина Николаевна. 

 Устазланы   усталыкъларын ёсдюрюу жаны бла араны  таматасыны къуллугъун толтургъан  Артур Кажаров    «КъМР-де Билим бериуню айнытыу» регион программаны юсюнден айта, этнокультурадан  окъуу-методология литератураны  жарашдырыуну юсюнден толуракъ хапарлагъанды.   Сёз ючюн, келир жылда биринчи мартха дери  8-9-чу  класслагъа «География», «Культура народов КБР» эм 10-11 класслагъа да  «История КБР» китапла чыгъарыкъларын   билдиргенди.   Аны бла бирге жууукъ заманда РФ-ни Жарыкъландырыу министерствосуна экспертизагъа    этнокультура бла байламлы 25 китап жибериллигин да ачыкълагъанды.  

Ахырында  Анзор Езаов коллегаларына  сагъынылгъан  соруулагъа  тийишли эс бурургъа  эм аланы бардырыугъа тири къошумчулукъ этерге кереклисин  чертгенди. 

- Миллет эм регион проектле жетишимли  бардырылыр ючюн  районланы, шахарланы  администрациялары бла   байламлыкъда ишлерге тийишлиди.  Аны бла бирге ишлени болжалларындан кеч къалмай эм тынгылы толтурур ючюн «жол карта» къуралыргъа тийишлиди.  Анга конкурс жумушла, ремонт ишле, материал эм оборудование бла жалчытыу, юйретиу  амалла   эм башха шартла да  кирликдиле,-деп къошханды Анзор  Клишбиевич.  

Курданланы Сулейман.