Быйыл КъМР-ни  Правительствосуну себеплиги бла  45,6 миллион сомгъа диабетлери болгъан 304 сабийге къанларында  глюкозаларына тохтаусуз  мониторинг бардыргъан системалагъа сенсорла (СНМГ)алыннгандыла.   

- Бюгюнлюкде бизде учётда 360 гитче саусуз барды. Аланы СНМГ бла жалчырча аталары бла аналарындан аслам тилек этилгенлей тургъанды. Алай бла республикалы бюджетден ахча бёлюннгенинден сора  сабийлени барын да сенсорла бла жалчытыргъа онг табылгъанды.   Быллай амал сабийлени халлерине тохтаусуз  контроль бардырыргъа эм инсулин керек болса билирге онг тапдырады.  Мындан арысында да диабетлери  тинтилгенлеге   быллай болушлукъ тапдырырча  жангыдан список къураллыкъды,- деп билдиргенди  КъМР-ни саулукъ сакълау министерствону  штатда болмагъан баш врачы, сабий эндокринолог  Елена Дышекова.

Сабий  эндокринология ара  Республикалы сабий кёп профильли стационарны   мурдорунда быйыл  август айда къуралгъанды.  Мында саусузлагъа эки жыйырма жатар жер барды, андан тышында, кюндюз стационар да оналты тёшек бла жалчытылыннгынды.  Арада  сабий врачла, эндокринологла,  кардиологла, окулистле, гастроэнтерологла, неврологла, психологла эм башхала урунадыла.  Аны бла бирге жууукъ заманда  РДКМЦ-де  амбулатор халда диабетни  школу да  ачыллыкъды.  Аны хайыры бла  эндокрин жаны бла специалистле  болмагъан  районладан саусузлагъа  мында  амбулатор болушлукъ берилликди. 

Эсге сала айтсакъ, бюгюнлюкде республикада  эндокрин ауруулары  болгъанланы арасында бир тюрлю  дарманны жараусузлугъундан  заран жетгенди деп шарт ачыкъланмагъанды.  Арада багъылгъанларындан сора  гитче саусузла саулукъларын кючлерча  «Радуга» санаториягъа ашырыладыла. 

Магометланы Сулейман.