Россейни Экономиканы айнытыу министерствосу «Эм иги муниципал сынам» деген конкурсда «Муниципал экономика эм финансла» эмда «Къыйматлы байламлыкъланы жалчытыу» номинациялада хорлагъанланы тизмесин туура этгенди. Аны юсюнден КъМР-ни Правительствосуну интернетде порталында айтылады.

«Бу номинациялада хорлагъан жыйырма муниципалитетге битеуда 360 миллион сом юлеширге оноу этилгенди. Ахча да иелерине жетгенди. Аны уа социал инфраструктураны айнытыугъа, коммунал техника сатып алыргъа, орамлада тийрелени тапландырыугъа къоратыргъа боллукъду», - дегенди РФ-ни экономиканы айнытыу министрини орунбасары Дмитрий Вахруков.

Хар номинацияда да онушар хорлагъан барды: бешиси – шахар округла, муниципал округла эмда шахарладыла, экинчилери уа – элледиле.

Республикада бу эришиуледе Басхан шахар округ бла Кременчуг-Константиновское эл хорлагъандыла. «Тогъуз миллион сомну ол шахар округда паркда тапландырыу ишлеге къоратырыкъдыла. Экинчи грантны уа (6,3 миллион сом) Басхан районда жаш тёлюню халкъланы эмда динлени араларында байламлыкъланы кючлендириу жаны бла проектлерин тамамлаугъа жиберликдиле», - дегенди КъМР-ни Правительствосуну Председателини биринчи орунбасары Муаед Кунижев.

Улбашланы Мурат хазырлагъанды.