Быйыл жаш тёлю проектлени битеуроссей эришиулеринде бизни республиканы келечиси, КъМР-ни Жамауат таматасында Жаш тёлю советни экономика эмда эркинлик жаны бла комиссияны башчысы Стелла Таованы проекти онтёрт мингден аслам заявканы арасында эм ахшы мингини тизмесине тюшгенди. Ол эндиге дери да социал проектле бла жетишимли кюрешип келеди, регионну жашаууна тири къатышады, республиканы атындан къырал эмда халкъла аралы даражада форумлагъа къатышханлай турады.

2022 жылда Стелла «Cyeber Fin Skills» билим бериу-жарыкъландырыу проектни жашауда бардырыргъа грант алгъанды. Бу сагъынылгъан проектни борчу уа эркинлик эмда финансла жаны бла окъуулулукъну регионну интернат халлы мектеплеринде бла сабий юйлеринде тургъан жаш тёлюге тюшюндюрюудю эмда аланы ол жаны бла ангылауларын айнытыуду.

Билим бериу-жарыкъландырыу проект жашауда бир ненча урумгъа бёлюнюп бардырыллыкъды. Биринчи кезиуюнде гуманитар-техникалы колледжде тренингле къураллыкъдыла. Ызы бла интернат-школлада тургъан жашлагъа бла къызлагъа да аллай тренингле бардырыргъа болушлукъ эталлыкъ, жангы, сейир башламчылыкълары болгъан жаш адамланы (колледжледен) сайлау боллукъду. Ючюнчю урумунда уа интернат-мектеплени сабийлерине кибертурнир къураллыкъды.

Проект ноябрьни ахырында огъарыда сагъынылгъан окъуу юйде башланып, анда эки кюнню ичинде жаш тёлю бла тренинг бардырылгъанды. Конкурс сайлауланы кезиуюнде интернатлада быллай тюбешиуню оздурургъа деп хазырлыкъны ётген жашланы бла къызланы арасындан тийишлиле айрылгъандыла. Аладан а къауум къураллыкъды.

Декабрьде уа сагъынылгъан къауум билим берген махкемелеге жюрюрюкдю. Тренинглени кезиулеринде ала бла бирге оюнла, болумланы тюрлюлерине тюшюнюу, ырысхы жаны бла аманлыкъчылагъа къалай алдатмазгъа, юйюр бюджет, ахчаны юсюнден ангылау, экономика дегенча затланы юслеринден сёлешиуле, ангылатыула да боллукъдула.

Трамланы Зухура.