Бу кюнледе иш бла Терс-Къолда  болгъанбыз. Къыш  болгъанына да къарамай, кюн жылы эм жарыкъ эди. Ёзенни туман басып турса, тау элледе алайды кюнню халы. Къар да кюнлюмде жокъду, Чегетде да артыкъ кёп тюйюлдю.

Элге  жетип, андан Азау талагъа да къайтмай къалай къалгъын. Болсада ол кюн канат жол ишлемей эди. Техника жаны бла халин тинтген кюн эди. Аны ючюн болур эди, адамла да  аз эдиле. Базарчыкъгъа киргенибизде да, сатыучула - кёп, алыучула - аз.  «Заман» газетден келгенибизни  билген тиширыуладан бири (атын айтыргъа унамагъанды) бизни тохтатып, жарсыуун айтханды:        

«Терс-Къолда эки мингнге жууукъ адам жашайды. Бизни бир жарсыуубуз барды, ол да неди десегиз - ёсюп келген тёлюбюз окъуудан бош заманын хайырлы ётдюрюрча онг болмагъаны. Хау, насыпха,  спорт залыбыз  барды, анда тутушуудан, боксдан, спортну башха тюрлюлеринден юйренир амал табылады. Лыжа спортдан школ да ишлейди, ол да игиди. Болсада  дагъыда  сабийлени тепсерге неда бир башха хайырлы  затлагъа юйретирча онглары жокъдула. Не уа бир бассейнибиз болса эди! Ол а  саулукъну кючлерге  къалай игиди.

Дагъыда бир жарсыуубуз. Элни ара орамыны ёргесинде, жолну онг жанында  къалгъан-къулгъан, кир-кипчиклеге деп орунла салыннгандыла, алай аланы    кетермейдиле.

Аллай кемчиликле эллилерибизни жарсытадыла, элибизни бетин чыгъарыргъа къоймайдыла. Мен «Заман» газетни алама, окъугъан да этеме. Анда ишлегенле бизни жарсыуларыбызгъа да эс бура турсагъыз, бек ыразы этериксиз». 

Холаланы Марзият.