Атмырзаланы Мадина Кёнделен элни Доттуланы Ахматны атын жюрютген биринчи номерли мектебинде директоруну  юйретиу жаны бла орунбасарыды. Ол «Цифровая образовательная среда» федерал проект къалай толтурулгъаныны юсюнден билдиргенди.  

Мадина Махтиевна айтханыча, проектни мураты билим бериуню бийик даражада жалчытырча шёндюгюлю, къоркъуусуз цифра болумну къурауду. Аны бла байламлы бизде цифра эм гуманитар профильли «Точка роста» ара ачылгъанды, ол сабийлени бу жаны бла билимлерин, окъутуу-юйретиу ишни хайырлылыгъын ёсдюрюрге себеплик этеди. «Точка ростада» къошакъ программала бла юйреннгенлени саны ёсе барады, бусагъатда ала 300-ден аслам боладыла.

Сабийле дерследен сора естественнонаучный, техника, гуманитар профильледе юйренедиле, ол санда дистанционный амалла бла да, аны ючюн ара жангыртылгъан мюлк-техника керекле бла да жалчытылыннганды.

Цифра амалла юйретиу-окъутуу ишге толусунлай сингдирилгендиле. Араны устазлары Владикавказда «Сабий технопарк «Кванториумда» «Гибкие компетенции проектной деятельности» деген курсну ётгендиле. Юйретиу «Сейирлик микродуния», «3D моделирование», «Къоркъуусузлукъну школу эм биринчи болушлукъ этиуню амаллары», «Студия Медиа-ара», «Пилотсуз учуу аппаратла», «Программированияда биринчи атламла», «Шахматла» деген программалагъа кёре бардырылады. Аны ючюн учрежденияда бусагъатдагъы излемлеге келишген компьютерле, фотоаппарат, виртуал шлем, кёп жумушланы тамамлагъан интерактив комплекс, конструкторла, шахматла ойнарча комплектле бардыла.

Арада юйретиуню эсеплери да ахшыдыла. Сабийлеге бу программала сейирдиле, аланы жетишимлери да бардыла. Сёз ючюн, башланнган классланы окъуучулары информатикадан устаз Макытланы Жулдузхан Борисовнаны башчылыгъында Информатиканы кюнюне аталгъан «Час кода» деген эришиуде ахшы кёрюмдюлери ючюн грамотала бла саугъаланнгандыла.   

Быллымны орта школунда шахмат турнирни муниципал кезиуюнде элни къаууму экинчи жерни алгъанды, кубок, грамотала эм майдалла бла къайтханды. Сабийле «Цифраны дерси» битеуроссей акцияда бу жаны бла жангы усталыкъла бла шагъырейленнгендиле, сертификатла къоллу болгъандыла. Онлайн халда къуралгъан «Кёп ёмюрлюк Югра» краеведение олимпиадада он эм кючлю окъуучуну къауумуна Энейланы Салима киргенди, ол диплом эм юйретиуде керекли гаджет бла саугъаланнганды. Бу олимпиадагъа къыралны 85 регионундан 500 мингден аслам школчу къатышхан эдиле.  

Белгилисича, шёндюгюлю юйретиу система адамгъа харкюнлюк жашауунда жараулу сынамны берирге тийишлиди. Атмурзаланы Мадина чертгенича, ала, бу борчну тамамлай, сабийлени халатсыз жазаргъа, текстлени тинтирге, математикагъа, тюрлю-тюрлю информация бла ишлерге, алгъан билимлерин хайырлана, прикладной заданияланы толтурургъа юйретедиле. «Цифраны» уа ол жаны бла онглары уллудула. Къарап кёрюрге боллугъу, интерактив инструментле, бир жанындан, жашауда болумланы кертисича суратлай, сабийни билимин къалай жаратыргъа кереклисине тюшюндюредиле, бирси жанындан а, къыйын предметле аралы концепцияланы тынчыракъ къурашдырыргъа юйретедиле. Андан тышында, цифра билимликлерин ёсдюреди, интерфейсле бла ишлерге сынамларын ёсдюрюрге себеплик этедиле.

Кульчаланы Зульфия хазырлагъанды.