Москвада ЦСКА-ны женгил атлетика-футбол комплексинде «Поддубныйни школ гёжеф лигасы» деген аты бла эришиу бардырылгъанды, анга къыралны битеу субъектлеринден жаш спортчула къатышхандыла.

10-11-жыллыкъланы араларында 32 килограммгъа дери ауурлукъ къауумда Элбрус районну олимпиада резервли спорт школундан Малкъарланы Омар тутушханды. Биринчи тюбешиуюнде ол Ярославльдан гёжефни айырмалы 9:0 эсеп бла хорлагъанды. Экинчисинде Алтайны келечисин да къытаргъа боллукъ эди, алай халат жибергени чырмагъанды. Ючюнчю жер ючюн сермешде Малкъар улу битеу кючюн жыйып эришгенди. Аны эсеби уа хорлам болгъанды - Омар доммакъ майдалны къытханды. 

Малкъарланы Омар тутушуу бла эки жылны кюрешеди, бу аны биринчи даражалы эришиуюдю. Ары дери ол республика эм регионла аралы турнирледе хорлай келгенди, аны тренерле Хапаланы Аслан бла Башийланы Махмут юйретедиле.

Москвада турнирде арбитрни къуллугъун а битеуроссей эм халкъла аралы даражалы судья Малкъарланы Зейтун толтургъанды.

Суратда: пьедесталда Малкъарланы Омар онг жанындан экинчи.

Кульчаланы Зульфия.