Бу кюнледе, Къабарты-Малкъарны 100-жыллыгъына атап, Нальчикге Москваны бек белгили театрларындан бирини – «Современникни» – артистлерини къаууму келгендиле. Ала бери ирландиялы  драматург Бернард Шоуну «Пигмалион» деген пьесасына кёре режиссёр Галина Волчек (театрны директору) салгъан аллай атлы спектакль келтиргендиле. Аны эки ингирде кёргюзтгендиле.

Биринчи кюн, 26 октябрьде, Нальчикде Музыка театрны фойесинде  пресс-конференция баргъанды. Аны республиканы  Маданият министрини орунбасары Къарчаланы Амина ачханды эм бардыргъанды. Ол айтханнга кёре, «Современник» театрны бу гастрольлары Россейни Маданият министерствосуну планы бла барадыла. Аланы Росконцерт «Алчы театрла» деген проектине кёре къурайды. 

«Айтхылыкъ «Современникни»  бизде спектакль кёргюзтюрюклери аламат саугъады республиканы 100-жыллыгъына. Алгъаракъда уа  къабарты, малкъар эм орус театрларыбыз Москвада «Современникни» сахнасында кеслерини оюнларын кёргюзтгендиле», - деп, Аминат Хадисовна бу театргъа, Рф-ни Маданият  министерствосуна да ыразылыгъын билдиргенди. 

Пресс-конференцияда «Пигмалион» спектакльде  Россейни халкъ артисти Сергей Маковецкий бла Россейни сыйлы артисти Алёна Бабенко, актриса  Марина Хазова эмда «Современник» театрны директоруну биринчи орунбасары Татьяна Баранова да болгъандыла. 

-Биз бери биринчи кере келгенбиз. Бу гастрольларыбыз, сентябрь айда Москвада бизни сахнабызда сизни миллет театрларыгъыз москвачылагъа аламат оюнла кёргюзтгенлери да тарыхда къаллыкъ шартладыла. Сейир театрла, сейир актёрла, бир бирге ушамагъан оюнла. Бир бирни билиу, арада жылыулукъ, шуёхлукъ жюрютюу не заманда да алгъа элтедиле. Театрланы араларында быллай байламлыкъла юзюлмей турлукъларына ийнанама. Жылны ахырына дери бизни гастрольларыбыз Санкт-Петербургда да барлыкъдыла, – дегенди  Татьяна Баранова.

Сергей Маковецкий «Современникге» Хиггинсни ролюна аны 2004 жылда Галина Волчек чакъыргъанын,  алгъа ийменнгенин, артда анга къалай хазырланнганын да айтханды. «Аллай рольгъа угъай деп айталлыкъ жокъду. Мени ол заманда кинода алдыра тура эдиле. Сора ыйыкъны ичинде, кече жукъуму бёлюп, токъсан бетде жазылгъанны кёлден билирге тюшгенди. Аны аллында уа башха театрлада аны къалай салгъанларына да къарагъанма. Аладан бир затха юйренирге излеп», - дегенди ол.

Спектакльде Элизаны ойнагъан Алёна Бабенко да театрда ишини, бу ролюню юсюнден да жангы затла билдиргенди. Ол аны он жыл ойнагъанлыкъгъа, жаш адам тюйюл эсе да, бу  ишни сюйюп этгенин айтханды. 

Башында айтхан артистледен сора да, анда  Россейни сыйлы артисти Максим Разуваев, Александр Берда, Марина Хазова, Марина Феоктистова, Мария Ситко, Мария Селянская, Татьяна Корецкая, Елена Козина, Георгий Богадист, Олег Феоктистов ойнагъандыла.

«Пигмалион» - адамла сюйюп къарагъан оюнду. Пигмалион деп румлу миф барды. Анда бир скульптор пил сюекден къызны ишлеп, аны сюйюп къалады. Сора анга назмула окъуп, саугъала этип, аны тюрлю-тюрлю ариу кийимле бла жасап турады. Бу оюнну анга келишген ышаны ататханды быллай атны  да, баям. Оюнну сюжет ызы уа былайды: филология илмула бла кюрешген алим, профессор Генри Хиггинс  бла Индиядан келген полковник Пикеринг, ол да тил илму бла кюрешген адам, тюбешедиле. 

Иш Лондонда барады. Пьесаны баш жигити Элиза  гюлле сатып айланнган жарлы къызды. Оюнну жигитлери жауундан къачып кирген жерлеринде тюбейдиле бир бирге. Элиза тюкенде ишлерге сюеди, алай сёз байлыгъын, сюрмеленмеген къылыгъын жаратмай, аны ары алмайдыла.  Къыз, Хиггинс ариу тилге юйретген  дерсле бергенин эшитип, ол тилек бла анга  келеди. Былайда эки алим да ёчешген этедиле. Алай бла Хиггинс аны ариу тилге, къылыкъгъа юйретип башлайды. Бир къауум замандан къызны анасына элтип кёргюзтеди. Ол Элиза даражалы тукъумдан болмагъанын терк ангылайды – кесин не бек ишлеп кюрешсе да, кесин жюрютюуде алгъын къылыгъына, сёзюне къайтып къала эди. Дагъыда бир къауум заманны юйретип, къызны даражалы адамланы ичине кийиргенде, аны  жарлы юйюрден болгъанын киши билмей къалады. 

Пьесада бек сейир сыфатладан бири къызны атасы Альфредди. Аны бу спектакльде Александр Берда аламат ойнайды. Ол биринчи сахнагъа профессорну арбазына келип, алайда тюбейди. Кеси да Хиггинс аны къызын юйюне алып кетгени ючюн хакъ излейди андан. Ол шарт алимлени экисин да сейирсиндиреди – атасы къызы ючюн башха къайгъы этмейди, жаланда хакъ излейди. Алай а ала Альфредни тил байлыгъына энчи эс бурадыла. Аны юсюнден полковник Пикеринг бир америкалы миллионерге жазады. Ахырында Альфред да бай адам болуп къалады – анга ол Америкадагъы миллионер ырысхысын къояды. 

Оюнну хычыуунлугъу, бек аллындан айтханда, зауукълу тилиндеди. Баш жигит Генри Хиггинс жютю тилли, чамчы, не гитче затчыкъны да эслеп, аны юсюнден къысха айта биледи  да, къараучуну оюнну узунуна кюлдюргенлей турады. Дагъыда спектакльни ойнагъанланы кийимлери, ала жюрютген затланы энчиликлери ючюн жаратаса. Былайда пьесаны авторуну фахмусу, андан иги да кеч туугъан художник Павел Каплевични оюмлары бир бирлерин уста тапханларын белгилерге керек болур. 

Мусукаланы Сакинат.