«Къоркъуусузлу качестволу жолла» деген миллет проектни чеклеринде бизни республикада тийишли ремонт ишле эбине жете турадыла. Бу кюнледе Куба бла Малка эллени арасында жол жангыртылып, хайырланыугъа берилгенди. Аны узунлугъу 6,6 километрди, ол кеси да «Кавказ» трассагъа къошулупду.

«Бу объектде жангыртыу ишле былтыр декабрь айны ахырында башланнган эдиле. Этилген келишимге тийишлиликде ремонтну келир жыл 30 июньнга бошаргъа керек эдик. Алай иш иги да алгъа тамам этилгенди, - дегенди КъМР-ни жол мюлк Управлениясыны къурулуш, реконструкция эмда ремонт бёлюмюню башчысы Назир Масаев. – Анда хар нени да алай терк бошагъанлыкъгъа, ишни качествосу къырал излемлеге эмда проект-смета документациягъа толусунлай келишеди. Качество дегенни биз эм башына салабыз, аны себепли Управленияны келечилери ремонт баргъан кезиуде анда хар неге да кёз-къулакъ болуп тургъандыла».

Ишчиле жолгъа эки къатлы асфальт жайгъандыла, юсюнде суу жыйылмазча жан-жанларын да тап этгендиле. Анда дагъыда жаяу жюрюгенлеге жолчукъла жарашдыргъандыла, чыракъла, белгиле, буруула да орнатхандыла. Саулай айтханда, быйыл Зольск эмда Басхан районлада жети жол жангыртылгъанды. Аланы узунлугъу 42,2 километр болады.

Улбашланы Мурат хазырлагъанды.