Хъыбар гуапэ

Иджыблагъэ Урысейм и Къэрал академическэ Театр Иным щекIуэкIа «ArtMasters-2022» Лъэпкъ чемпионатым и кIэух концертыр Япэ каналым къитащ. Сценэр зэрагъэщIэрэщIари, концертым макъхэр зэрыщагъэIуари, уэздыгъэри, артистхэм я фэилъхьэгъуэхэри зэпеуэм хэтхэрщ зыгъэхьэзырар. Пшыхьыр гукъинэжу къызэрагъэпэщащ икIи «Фэилъхьэгъуэхэм я художник» унэтIыныгъэм щытекIуащ ди лъэпкъэгъу Сэралъп Ликэ.

Пшыхьым хэтащ чемпионатым щытекIуахэр, къызэгъэпэщакIуэ, кIэлъыплъакIуэ комитетхэм хэтхэр, ирагъэблэгъа хьэщIэхэр. Программэм хыхьэу къатащ зэпеуэм хэтхэм я лэжьыгъэ щIэщыгъуэхэр, артист цIэрыIуэхэу Агутин Леонид, Пелагее, Джонни, DJ Groove, нэгъуэщIхэми япэу утыку кърахьа я уэрэдхэр.

«ArtMasters» Iуэхум хэтщ илъэс 18-м къыщыщIэдзауэ илъэс 35-рэ ныбжьым ит, творческэ зэфIэкI зиIэ щIалэгъуалэр. Иджырей зэхыхьэм цIыху миным щIигъу унэтIыныгъэ 20-м я зэфIэкI щеплъыжащ театр, кино, рекламэ, телевиденэ, нэгъуэщI унэтIыныгъэхэм. «Фэилъхьэгъуэхэм я художник» унэтIыныгъэм къызэщIеубыдэ лIыхъужьым и фэилъхьэгъуэр гъэхьэзырыным къыдэкIуэу абы къыгуэхыпIэ зимыIэ цIыкIуфэкIухэри щIыгъуу, и теплъэр къызыхуэтыншэу зэгъэпэщыныр. Ар къехъулIэн папщIэ, зэхьэзэхуэм хэтхэм фэилъхьэгъуэхэмрэ модэмрэ я тхыдэм, иджырей гъуазджэмрэ дизайнымрэ я унэтIыныгъэхэм, дуней псом щызэрахьэ фэилъхьэгъуэхэм, художественнэ образым, графикэ бзэм, сурэт щIыным и Iэмалхэм, сценографием куууэ щыгъуазэу, къэхутэныгъэ лэжьыгъэхэр ирагъэкIуэкIауэ щытын хуейт.

Япэ Iыхьэм хыхьэу видео IэмалымкIэ Ликэ закъригъэцIыхури, и лэжьыгъэхэм хигъэгъуэзащ. ЕтIуанэ Iыхьэм къыщапщытащ зэхьэзэхуэм хэтхэм ябгъэдэлъ щIэныгъэр. Ещанэ Iыхьэм творческэ лэжьыгъэхэм иужь щихьащ. Абы хыхьэу къыпэщылът балет, оперэ, парад жанрхэм щыщ эскизхэр ягъэхьэзырыну. «Пащтыхь СулътIан» таурыхъым хэт персонажхэм ящыщ зыбжанэ - Бадзэ, Аргъуей - жыпIэми, Ликэ ищIащ.

- Иужь Iыхьэр нэхъ гъэщIэгъуэнт. Абы хыхьэу къытпэщылъ лэжьыгъэр къыщысщIэм, хуабжьу сыкъэуIэбжьащ. ЩымыIэ жанрыр - рэп-фэнтези-р къыслъысащ. «Песнь о вещем Олеге» тхыгъэм къыхэщ блэм и концепцэр зэхэзгъэувэн хуейт. Сыкъезыгъэлар иужьрей Iыхьэм хэтхэм ди лэжьыгъэхэр щедгъэхьыну къытхуагъэува пIалъэр зэрагъэIэпхъуарщ. Абы и фIыгъэкIэ фэилъхьэгъуэм ехьэлIа си гупсысэхэм зезгъэубгъуащ, - жеIэ Ликэ. - ЯпэщIыкIэ фэилъхьэгъуэм шым и къупщхьэхэм щыщ Iыхьэт къыщызгъэлъэгъуар. ИужькIэ, и шыкIэр зэIуиха нэужь, ар блэ хъужырт. ШыкIэр щызэщIэкъуам деж шым и тхым хуэдэу злат, къызэIупха нэужь блэ фIыцIэ хъужырт. ЯпэщIыкIэ зи IувагъкIэ зэхуэмыдэ тхылъымпIэхэмкIэ, картонкIэ, рентген плёнкэкIэ зэрыхъум сеплъащ. Иужьым тхылъымпIэм сыхуэкIуэжащ. Лэжьыгъэр сценэ щIыбагъым щысхъумащ, зэпымыууэ сыкIэлъыплъу, ипэ иту шыкIэр къызэIуимыхын щхьэкIэ. Лэжьыгъэм зыгъэпсэхугъуэ симыIэу тхьэмахуитIкIэ сыпэрытащ, си дэIэпыкъуэгъухэр сщIыгъуу. Дауэ хъуми, текIуахэм си цIэр зэрахэтыр згъэщIэгъуащ. Абы сэркIэ, дауи, мыхьэнэшхуэ иIэщ, сыту жыпIэмэ модэм ехьэлIауэ фэилъхьэгъуэхэм я дизайнер мыхъуу, иджы фэилъхьэгъуэхэмкIэ театр художник лэжьыгъэми сызэрыхэгъуэзам сегъэгушхуэри.

Ахъшэ саугъэтым къыдэкIуэу, Сэралъп Ликэ тхьэмахуитIкIэ и щIэныгъэм щыхигъэхъуэну «Геликон-Опера» театрым ягъэкIуащ. ЗэфIэкI зиIэ ди хэкуэгъум и ехъулIэныгъэхэм дяпэкIи хигъэхъуэну дыхуохъуапсэ.

ТЕКIУЖЬ Заретэ.