КъМР-ни Къурулуш эмда ЖКХ министерствосунда бардырылгъан кенгешде жашау журтланы рыногунда багъаланы мардасы жаны бла статистика къарауну кезиуюнде ачыкъланнган кемчиликле сюзюлгендиле. Аны ишине къырал статистика службаны Шимал-Кавказ федерал округда управлениясыны башчысыны орунбасары Аурика Гаштова да къатышханды, деп билдиргендиле ведомствону пресс-службасындан.

Аллай тинтиуле «Инсанланы жашау журтла бла жалчытыргъа эмда коммунал жумушла ючюн тёлерге къыралдан себеплик этиу» деген энчи къырал программагъа кёре бардырыладыла. Жыйылыуда айтылгъаныча бир квадрат метрни багъасын билиу социал жаны бла магъаналыды. Нек дегенде ол, юй сатып алгъанлагъа берилиучю субсидияланы тергегенде эсге алынады.

Сёз ючюн Къабарты-Малкъарда бир квадрат метрни багъасы 48197 сомду. Алай бир-бирле уа, фатарла сатылмагъанларыны неда аланы багъалары бек аз болгъанларыны юсюнден билдиредиле статистика службагъа. Ол а аллай шартланы тюз болгъанларына ишеклик туудурады. Алагъа кёре субсидияланы ёлчеми да аз болады, фатар сатып алыргъа жетмей къалады.

Аурика Гаштова кенгешге къатышханлагъа анга бек уллу эс бурургъа, тюз шартла кёргюзтюрге чакъыргъанды. Билдириуле жаланда республикада бу сферада халны ачыкълауда хайырланыллыкъларын да чертгенди.

Улбашланы Мурат.